Pyrshang ki bor distrik ka SWGH ban kyntiew ïa ka koit ka khiah, ka pule puthi, ka rep ka riang bad jingshngaiñ

Shillong, Naiwieng 14: Ka bor synshar district jong ka South West Garo Hills ka dang pynjur ïa ka jingpyrshang ban kyntiew ïa ka koit ka khiah, ka pule puthi bad ka rep ka riang, katba ki pulit ki dang peitngor bha halor ka jingleit jingwan sha shiliang pud, ki kam ba ïadei bad u drok bad ki kam runar pyrshah ïa ki kynthei khynnah.
Ïa kine ki jingjia la pynpaw da ka Deputy Commissioner Anendya Raajsshre, IAS, bad u Superintendent of Police u Vikash Varma, IPS, ha ka jingïakren ba kyrpang bad ki nongthoh khubor na Shillong kum shi bynta jong ka jingleit jngoh ki nongthoh khubor ba la pynlong da ka Directorate of Information and Public Relations (DIPR).
Haba ïasam ïa ka jingbishar jong ka ïa ka district naduh ba ka la shimti ïa ka kam ha u bnai Jymmang mynta u snem, ka Raajsshre ka la ong ba ka South West Garo Hills ka ïoh mad ïa ka imlang sahlang kaba suk, ha kaba ki briew na ki jaidbynriew bapher bapher ki im lang ha ka jingïatylli. Hynrei ka la kdew ba ki katto katne ki dak jong ka jingroi ki donkam ïa ka jingpyrkhat kaba bniah, kaba la pynlong ïa ka bor synshar ban sdang ïa ki jingïalang bishar bniah jong ki tnad man ka por.
Ha ka liang ka koit ka khiah, ka bor synshar ka la buh hakhmat eh ïa ka jingsumar ïa ki longkmie bad ki khynnah hapoh ka Early Childhood Development Mission, khamtam ban pynduna ïa ka jingkha khun ha ïing bad ka jingïap jong ki longkmie. Ka la ong ba don ki kynthei kiba dang artatien ban jied ïa ka jingkha khun ha ki jaka sumar namar ka jingsngewkhia ban iehnoh ïa ki khun bad ki jingri jong ki khlem da peit, katba kiwei pat ki kham kwah ban kha khun ha ïing ha ka por ba don ki jingjia ba kyrkieh ha ka por miet.
Ban weng ïa kane, la shim ïa ki jingpynsngewthuh ban pynithuh ïa ki longkmie ba armet ïa ka jingdon jong ki jingshakri ba man ka sngi ha ki PHC, CHC bad ki civil hospital. Ka la ithuh ïa ki jaka ba don hapoh ki PHC jong ka Mellon, Zikzak bad Salmanpara ha kaba ka jingbym kwah ban kha khun ha ki jaka sumar ka dang sah, katba ka jingbym biang ka jingpynïasoh network ha ki katto katne ki jaka ba don khlaw ka wanrah ïa ki jingeh kiba kham bun.
Ka jingpule ka dei kawei pat ka jingthmu kaba kongsan, ha kaba ka bor synshar ka leh ïa ki jingwad bniah ban ithuh ïa kiba la sangeh skul bad ban pynsuk ïa ka jingpynrung kyrteng jong ki ha ki klas ba kyrpang ban ïoh ïa ka jingpynshisha ban nang ban thoh bad pule. La wad ruh ïa ka jinghikai skul kaba plie na ka bynta kito ki bym lah ban wanphai biang sha ki klas ba man ka sngi.
Ka bor synshar ka dang buddien ruh ïa ka jingpyntreikam ïa ka skhim PM POSHAN ban pynthikna ïa ka jingbam shiteng sngi kaba man ka por ha ki skul bad ka jingpynbiang ïa ki dohkha la kumno kumno shisien shi taiew. Katba ym shym la don kano kano ka jingjia jong ka jingbam ba la song ne ka jingsam beit ïa ki jingbam ba la shet, la lap ïa ki jingbym beit ha kaba ai jingbam ha ki katto katne ki skul, kaba la pynlong ban leh pyrshah ïa ki nonghikai bad ki nongpynïaid skul kiba donkti.
U Raajsshre u la ong shuh shuh ba la bthah ïa ka tnad pule puthi ban bishar bniah ïa ka jinglah jong ka district kaba kham duna bha ha ki eksamin Class X bad XII bad ban aiti ïa ka kaiphod ha kaba kut jong u snem ban lap ïa ki jingduna bad ban ai jingmut ïa ki lad ki lynti ban pynbeit.
Haba pynpaw ïa ka jinglah jong ka district ha ka rep ka riang, ka la ong ba ki nongrep ki pynmih ïa ki jait soh bad ki jhur bapher bapher hynrei ki dang ïai bteng ban ïakynduh jingeh ban pynïasoh lang ïa ki mar jong ki bad ban ïoh ïa ki ïew kiba kham heh. Ka bor synshar ka dang trei namarkata ban pynbeit ïa ki nongrep ha ki seng nongpynmih mar rep bad ki seng treilang jong ki shnong ban pynkhlaiñ ïa ka jinglah ban ïateh kular bad ka jingïadei bad ki ïew ki hat.
Ka la bynrap ba la pynshlur ïa ka jingpynkiew dor lyngba ki jaka pynmih marbam ha ka thaiñ, da kaba plie dang shen ïa ka karkhana pynmih ïa u kew bad ka karkhana pynmih ïa ka umsohjew ha ka distrik. La pyrshang ruh ban pynkhlaiñ ïa ka kamai kajih jong ki kynthei lyngba ki Self-Help Group (SHG), khamtam eh da kaba kyntiew ïa ka kam ri syiar bad ri sniang hapoh ka jingthmu Lakhpati Didi.
Ka bor synshar ka pynleit jingmut ruh ha ka jingkhuid jingsuba hapoh ka Swachh Bharat Mission, katba ki prokram pynsngewthuh ki dang pynlong ban weng ïa ki jingkha khun ha ki khynnah samla bad ki jingeh kiba ïadei bad ki kam runar pyrshah ïa ki kynthei bad ki khynnah, kynthup ïa ki kam runar hapoh ka aiñ ïada ïa ki khynnah na ki kam leh beijot (POCSO).
Ha kajuh ka por, u Superintendent of Police, u Vikash Varma, IPS, u la ong ba ka jinglong jingman jong ka suk ka saiñ baroh kawei ha South West Garo Hills ka dang shongsuk, watla ki pulit ki dang ïai bteng ban buddien ïa ka ïaid ka ïeng sha shiliang pud, ki kam ba ïadei bad u drok bad ki kam runar pyrshah ïa ki kynthei khynnah.
U la ong ba kane ka district ka don lang u khappud international bad ka Bangladesh bad u khappud hapdeng ki jylla bad ka Assam. Watla ka jinglong jingman ha baroh ar tylli ki khappud ka dang long kaba suk, hynrei ki pulit ki dang peitngor bha na ka jingwan rung tuh, ka jingleit jingwan sha shiliang pud bad kiwei kiwei ki jingeh ha ka liang ka jingshngaiñ.
Halor ka jingleit jingwan sha shiliang pud, u SP u la ong ba ki case kiba ïadei bad ki trai ri Bangladesh kiba pyrshang ban wanphai sha la ka ri lyngba ka Meghalaya ki la mih kum ka jingkhuslai.
Ha ka jingkhynra kaba dang shen ha ka thaiñ Zikzak, ki pulit ki la kem ïa 7 ngut ki briew, ba kynthup ïa 6 ngut ki nong Bangladesh. La ïathuh ba kitei ki 6 ngut ki nong Bangladesh, ki dei kiba sah ha ki jaka bapher bapher jong ka Ri India, ba kynthup ïa ka Delhi, Bengaluru bad Surat, shwa ba kin pyrshang ban rung sha Bangladesh lyngba ka Jylla Meghalaya.
Halor ki kam kiba ïadei bad u drok, u la ong ba ka South West Garo Hills kam dei ka lynti ïaid ba heh jong ka khaïi pateng na ka bynta ki drok, ha kaba bunsien ki jingjia kiba la ïoh jingtip ki dei kiba ïadei bad ka jingkhaïi rit paid. U la pyntip ba dang shen ki pulit ki la kem arngut ki briew hapoh kaNarcotic Drugs and Psychotropics Substances (NDPS) Act bad la ïoh ban kurup 2000 tylli ki dawai Yaba.
Ha kaba ïadei bad ki kam runar pyrshah ïa ki kynthei khynnah, u SP u la ong ba ki case hapoh ka ain POCSO, kynthup ïa kiba ïadei bad ka jingkha khun samla bad ka jingshah lehbeiñ ki khynnah rit, ki dang ïai bteng ha ka District. U la ban jur ïa ka jingdonkam ban pynsngewthuh kham bha ïa kane ka aiñ, khamtam eh ha ki samla pule bad ki jaka pule.
U la bynrap ruh ba ki pulit ki ju pynlong ïa ki prokram pynsngewthuh paidbah ha ki skul, kolej bad ki jaka ïew ha kaba ïadei bad ki kam runar ha ka cyber, ka jingdih drok, ka aiñ POCSO bad ka aiñ NDPS.
U Varma u la pynshai ruh ba ym shym la don kano kano ka jingjia kaba ïadei bad ki lehnoh ne ki dak jong ka jingmih biang jong ki kynhun lehnoh ha ka distrik, da kaba pynskhem ba ka jinglong jingman jong ka jingïada baroh kawei ka dang don hapoh ka jingpynïaid.