Ka jingong jong u Rituraj Sinha ba ka ILP kan ktah ïa ka Tourism ka long kaba bakla : KHNAM
Shillong, Rymphang, 16: Ka Khun Hynñiewtrep National Awakening Movement (KHNAM) ka la kynthoh ba ka jingong jong u National General Seretary ka BJP u Rituraj Sinha ba ka Inner Line Permit (ILP) kan ktah ïa ka jngohkai pyrthei ka long kaba bakla.
“Ka Inner Line Permit (ILP) ka la sah teng ha Delhi la saw snem bad na ka liang u National General Secretary ka BJP u Rituraj Sinha u dang ong ba hap ban ïatai bha hadien ka elekshon ka long kaba sngew thamula. Ka mih ka jingjingkylli ba ha kine ki saw snem ba ladep hato ka ILP ka la shu sahkut tang ha ki almari ha Delhi?,” la buh jingkylli ka KHNAM ha u kyrwoh ba la phah da u Vice President u Bah Thomas Passah.
“Ka Sikkim kaba la paw bha kum kawei na ki jaka jngohkai pyrthei ha ka Ri India bad ha ka pyrthei baroh kawei ka don ïa ka Restricted Area Permit (kaba long kum ka ILP) bad ruh ïa ka Protected Area Permit bad kine ki jingpyrkhing ki khlem pynhiar ïa ka kam jngohkai pyrthei hynrei ka dang kyntiew. Namarkata, ka jing ong jong u Rituraj Sinha ba ka ILP kan ktah ïa ka tourism ka long kaba bakla,” la ong ka KHNAM.
“Ka ILP ka dei ban ïada ïa ka hok longtrai jong ngi ki ritpaid kumba la ïohi jngai da ki bor synshar Phareng kiba la kynthup ïa ka ri Khasi ha ka BEFR 1873, namarkata, ka ILP ka long kaba donkam bha bad ngim lah ban ïapeiñ ïa ka hok longtrai jong ngi bad ka spah namar dang lah ban longtrai ha ka jingduk bad ïa ka jingriewspah ha ka jinglong mraw,” la ong shuh shuh ka KHNAM.
“Ka seng ka shim ruh ba ka Sorkar barim bad baroh 60 ngut ki MLA ki la shu mynjur arsap ïa ka Resolution ILP ha u snem 2019, namarba ngim ïohi ba kan don ka jingbuddien bad ka jingtynruh ba shong nongrim ha kine ki saw snem ba la leit,” la kynthoh ka KHNAM.
“Ha ka 11 tarik, Nohprah, 2019 ka Sorkar MDA ka la pdiang da ka jingkmen ïa ka Notification jong u President ka Ri India kaba la weng noh ïa ka kyntien Khasi-Jaiñtia na ka Preamble jong ka Eastern Bengal Frontier Regulation Act 1873 bad ngim ïohi ba kan don ka jingpyrshah lane ka jingmudui pyrshah ïa kane ka Notification namar ka jingweng ïa ka kyntien “Khasi-Jaiñtia” na ka BEFR 1873 ka pynkheiñ im im peit peit ïa ka clause (3) (a) jong ka Article 372 kaba la kren shai, “Nothing in clause (2) shall be deemed – (a) to empower the President to make any adaptation or modification of any law after the expiration of (three years) from the commencement of the Constitution ..” “Ka bor ban pynkylla ïa kum kine ki Pre-Constitution laws ha kano kano ka por ka shong beit tang ha ka Parliament,” ong ka KHNAM.
“U Bah H.S Shylla kum u CEM ka KHADC u la mudui pyrshah ïa kane ka Notification hynrei hadien ka jingkhlad noh jong une u nongïalam wat ka KHADC ruh ka khlem shimti ïa lane ka kam,” la ong u kyrwoh.