Mawkyrwat, Rymphang, 25: U District Magistrate jong ka South West Khasi Hills District u la pyntip ban na ka daw ka jingdon jong ka General Election jong ka Meghalaya Legislative Assembly 2023 ka ban long ha ka 27 tarik u Rymphang, 2023 ka long kaba donkam ban pyrkhing ïa ka ïaid ka ïeng jong ki kali bad ki briew ha ki jaka khappud bad ka Bangladesh namar lada ym don ka jingteh pyrkhing ïa ka ïaid ka ïeng jong ki briew bad ki kali ka lah ban wanrah ïa ka jingpoi jong ki martuh bad kiwei kiwei ki kam be-aiñ kiba lah ban wanrah ïa ka jingthut ha ka jinglong jingman ha ki jaka khappud bad kaba lah ban ktah ïa ka shongsuk shongsaiñ jong ki paidbah.
Namarkata, la donkam ban pyrkhing khnang ba kan don ka jingïaid beit ïaid ryntih jong ka election. Ha kaba ïa dei bad kane, u District Magistrate u la pynjari ïa ka Section 144 CrPC kaba pyrkhing ïa ka ïaid ka ïeng jong ki kali bad ki briew hapoh ka 1 Km na ka International border hapoh South West Khasi Hills District naduh ka 24 tarik u Rymphang haduh ka 2 tarik u Lber, 2023.
Kane ka hukum kan treikam mardor.
Mairang: Na ka bynta ka jingïaid beit ïaid ryntih jong ka jingpynïaid ïa ka elekshon sha ka Ïing Dorbar Thaw Aiñ ka jylla, u District Magistrate ka Eastern West Khasi Hills District Mairang, katkum ka bor ba la pynkup ha u hapoh ka section kaba 144 jong ka CrPC, u la pynmih ïa ka hukum kaba pakhang ïa ka jingpynlong ïa kino kino ki jait jingïalang paidbah, ne jingïaid paidbah ne kino kino ki jingïalap elekshon, ha ki 48 kynta ki ban bud, ka ban sdang naduh ka por 4 baje janmiet jong ka 25 tarik u Rymphang 2023 haduh ka por 4 baje janmiet jong ka 27 tarik u Rymphang 2023.
Katkum kane ka hukum, la khang ruh ïa kano kano ka rukom ïalap elekshon lyngba ki bulk SMS ban kyrshan ne pyrshah ïa kino kino ki kyrtong ne parti. La khang ruh ïa ka jingpyllait ïa kino kino ki Exit Poll da kino kino ki kor pathai khubor ne ha kano kano ka rynsan social media.
Shuh shuh, kane ka hukum ka pakhang ruh ïa ka jingdon jong ki nongthep vote ne ki nongïalap elekshon kiba dei na shabar konstitwensi. Kumjuh ruh ïa ka jingpyndonkam ïa kino kino ki jait tiar pynsawa paidbah naduh ka por 4 baje janmiet jong ka 25 tarik u Rymphang 2023, haduh ban da dep noh ka jingïathep vote ha ka 27 tarik u Rymphang 2023.
