Ha ïew Mawkyrwat ïeng rynsan ban pyrta ïalap elekshon ki lai tylli ki seng saiñ hima
Mawkyrwat, Rymphang, 25: Ki lai tylli ki seng saiñ hima kiba hapoh jong ka 36-Mawkyrwat Constituency h aka sngi Balang shwa ban kut ki kynta ban ialap elekshon ba la buh kyndon da ka Election Commission of India ki la pynlong ka jingïalang paidbah ne ka public meeting ha Ïew Mawkyrwat, South West Khasi Hills District ban ïalap elekshon bad pynsngew ruh ha ki paidbah ïa ki mat treikam ba kum ki party ka thmu nangne shakhmat lada ki jop ha kane ka MLA Election 2023.
Ki lai tylli ki seng saiñ hima kiba la pynlong ïa ka jingïalang ki long ka United Democratic Party (UDP) ha kaba u bah Renikton Lyngdoh Tongkhar u dei u kyrtong, ka National People’s Party (NPP) ha kaba u bah H. Stalyne Diengdoh u long u kyrtong bad ka Indian National Congress (INC) ha kaba u bah Carness Sohshang u long u kyrtong.
Kine ki lai ngut ki kyrtong ha ki jingkren paidbah jong ki mynta ka sngi ki la pynsngew ïa la ki jong ki thong bad ki jingthmu ba ki don ban leh ha kine ki san snem ki ban sa wan bad ha kajuh ka por ki da kyrpad de ïa ki paidbah jong ka Mawkyrwat Constituency ba kin ai lem ka jingkyrshan da kaba kin ïa mih ha ka 27 tarik u Rymphang, 2023 ba kin ïa ñion ha ki symbol ba kitei ki kyrtong ki la pynsngew.
Ki nongkren ha ka jinngïalang jong ka United Democratic Party (UDP)ki long u bah Elevenson Wanniang, President jong ka UDP Mawkyrwat Youths Wing, u Poland Sohphoh, u bah Darius Lyngkhoi na Rangblang uba dei u Adviser jong ka INC mynshwa, bad na u bah Renikton Lyngdoh Tongkhar.
Ki nongkren ha ka jinngïalang jong ka National People’s Party (NPP) pat ki long u bah Enbin Kharraswai, u bah Kitborlang Nongrem State Youth President ka NPYF bad u bah H. Stalyne Diengdoh. Nangta, ha ka Indian National Congress (INC) ki long u bah J.A. Lyngdoh, bah P. Wanniang, bah E. Kharjahrin, bah Pholand, bah K. Lyngkhoi, Vice President ka MPCC, u bah Carnes Sohshang, bad u bah Wallambok Syiemïong.
Ha kane ka sngi la ïoh ban pynshit pynshngaiñ ruh ïa ka jingïalang jong ki lai tylli ki seng saiñ hima da ki nongrwai bad ki nongshad na ki samla jong ka dong ka thaiñ.