Hap ïeng ki Pulit bad ki VDP hapdeng ba ïatyngkhuh ki nongkyrshan NPP bad HSPDP

Nongstoiñ, Rymphang 25: Ka Dorbar Shnong Riangdo ryngkat ka tnad pulit, ha ka sngi thohdieng jong ka taiew ki la hap ban ïeng da kaba ïasnoh kti hapdeng ka surok, ban pynïakhlad ïa ki nongkyrshan ka NPP bad HSPDP kiba la ïatyngkhuh ha ïew Riangdo jong ka Mawshynrut Constituency.
Kane ka jingïatyngkhuh ki nongkyrshan ka NPP bad HSPDP, ka dei hadien ba ka Seng NPP ka la dep ban ai jingkren ha ka rynsan ïalap election ha ïew Riangdo. Hadien ka NPP, ka la dei sa ka pali jong ka HSPDP ban kiew rynsan bad namar ka jingbun ki paidbah nongkyrshan na baroh ar liang ka la pynshlei ïa ka ïew Riangdo.
Ka jingshim jingkitkhlieh jong ka Dorbar Shnong Riangdo ban phah ïa ki volunteer ryngkat ki pulit, ka long ban peitngor khnang ban nym don kano kano ka jingïakajia hapdeng ki nongkyrshan jong ka NPP bad HSPDP kiba la ïatuid da ki phew hajar ngut.
Ha kane ka sngi baroh 5 ngut ki kyrtong ki ban ïa ai reng noh Mawshynrut Constituency ki la ïapoi ryntih ha Riangdo, ban ïeng ha kajuh ka rynsan uwei hadien u wei u kyrtong na ka bynta ban ïalap election paidbah, ha shwa ba ki paidbah kin sa leit ban jied ïa la ki jong ki jong ki nongmihkhmat ha ka 27 tarik mynta u bnai.
Ïa kane ka rynsan ïalap election ha Riangdo la pynïaid da ka Dorbar shnong Rïangdo bad u kyrtong u ba la ïoh ban ïeng rynsan nyngkong duh u dei u kyrtong ka Seng BJP u bah Beejoy Kynter, bud sa u kyrtong ka Seng Congress u bah Andrew Charles Gare, u kyrtong ka Seng TMC u Justin G Momin, bteng sa u kyrtong ka NPP u bah Gigur Myrthong bad khatduh khatwai u kyrtong ka seng HSPDP.
Ki kyrtong ha kane ka rynsan kila khroh ïa ki paidbah lyngba ki nia bad ki jingkular ba har rukom bad ki la pynshai ruh ïa ki mat bad ki nongrim ki jong ki ba ki ïeng na la ka jong ka Seng saiñ pyrthei.