Shillong, Nohprah 21 : Ka Khasi Hills Autonomous District Council (KHADC) ka la pynkhreh lang ban kynriah noh sha New Shillong bad ka jingïakren halor kane ka bynta ka dang ïaid shakhmat, ong u Executive Member ka tnad Building Bah Teibor Pathaw haba jubab halor ka jingkylli ba wanrah da u Bah Teinwell Dkhar ha ka Dorbar Tlang jong ka KHADC ha kane ka sngi Palei.
“Kane ka mat kadei kaba la slem bha namar nga la don hangne la saw samoi kata naduh ka samoi ba nyngkong kane ka jingïakren ban pynkynriah noh shawei ka la mih hynrei kam pat urlong haduh mynta,” ong utei u MDC ka Shella.
Hynrei, haba jubab halor ka jingkylli ba haduh katno ka Executive Committee ka shimkhia ïa kane ka kam, u CEM ka KHADC, Bah Pynïaid Sing Syiem u la ong, “Na ka liang jongngi dang shen kumba saw bnai ei ei ngi la kynduh ïa u Myntri Rangbah bad ruh ïa u Symbud Myntri Rangbah ban kyrpad na ka bynta ka jaka. Shen ngin sa kynduh biang ban buddien namarba ngi pan jaka kham shajan bad ka Ïing Dorbar jong ka Meghalaya ha Mawdiangdiang.”
Shuh shuh u ong ruh na ka liang ka tnad Urban Affairs ki ong ban sa leit peit lang la ka jaka ka ïahap neem.
Haba ïadei pat bad ka jingtei ba ka Council ka treikam mynta, u CEM u la ong ba hadien ba ki la ïoh ban kynriah pat sha kawei ka jaka, kin sa shong da ka Committee ban rai kumno ban leh khnang ba kin lah pat ban pynmih khajna na bynta ka Council.
U CEM u la pyntip ruh ba ka Council ka pan ïa ka jaka kaba 20 akar na ka sorkar jylla khlem kano kano ka jingsiew.
