04tarik u Lber yn kut ka samoi treikam, haduh mynta pat shai lano ka elekshon MDC kan long

Shillong, Nohprah 21 : U Chief Executive Member ka KHADC, Bah Pynïaid Sing Syiem ha ka sngi Palei u la ong ba haduh mynta hi ym pat shai lano ka elekshon MDC kan long watla ka samoi treikam kan kut noh ha ka 04tarik Lber, 2024.
Haba jubab halor ka mat kaba la wanrah da ka liang pyrshah ha ka Dorbar Tlang ba ki kulmar jingmut halor ka elekshon MDC lano kan long, u CEM u la ong ba kum ki MDC ki la pynkhreh na ka bynta ka elekshon namar kim tip satia la kan long kloi ne yn pynjlan.
Shuh shuh haba jubab halor ka Delimitation Committee, u CEM u la ong ba hadien ba ki la shimti ai ka EC thymmai ki la ïoh pdiang bun bha ki jingujor na ki paidbah ban peit bniah ïa ka jingbun paid ki constituency da kaba kdew ba ki don ki constituency kiba don duna bha ki nongthep vote katba don pat ki constituency kiba la bun shaba palat.
“Ka jingthaw ïa ka Delimitation Committee ruh kan long katkum ka jingbthah jong u Lat,” u la bynrap biang.
U Bah Pynïaid u la kdew ruh ba lada peit kum ka Laban constituency, ka jingdon ki nongthep vote ka long tang 12 ne 13 hajar ngut katba ka Mawlai pat ka la don haduh 55 hajar ngut kaba kdew ba ka la don ka jingïapher kaba jur namar ha ka por ba ai ïa ki skim, la ai beit mar kumjuh khlem peit heh ne rit constituency.
Kumta, u ong ba dei halor kine ki nongrim ba ka EC ka la thoh sha u Lat bad la pynmih ïa ka jingpynbna ban don ïa ka Delimitation Committee. U ong ruh ba ïa ka tarik elekshon mynta ka shong ha ka sorkar jylla ban pynbna lano kin pynlong.