Shillong, Nohprah, 21: Ka Khasi Students’ Union ba la lamkhmat da u President u samla Lambokstarwell Marngar ha ka sngi Palei ka la ïakynduh kyrkieh ïa ka Myntri ka Koit ka Khiah jong ka Sorkar Jylla ka Dr. Ampareen Lyngdoh ban pynsngew halor ka thungkam thungjam ha NEIGRIHMS kaba la mih bun tylli ki jingkynrum kynram.
Katkum ka jinglum jingtip jong ka Seng, ka shem ba na bynta ka post jong Record Clerk, kumba 15 tylli eiei ki jingkylli ki dei ha ka ktien Hindi bad kane hi ka long kaba pynduh nong ïa ki samla Khasi ba la pynkhreh bad thoh ïa ka eksamin na bynta kane ka post. Kane ka rukom buh jingkylli ka la ïaid lait na ki kyndon ba la buh da ka eksamin kaba dei ban long ha ka ktien Phareng (English).
Shuh shuh ka seng ka la ïoh khubor ruh ba ki bor pynïaid jong ka NEIGHRIMS ki kwah ban pynmih noh mardor ïa ka resol jong ka eksamin watla ym pat lah ban pynshisha ïa ki kot ki sla jong ki nongïaleh ïaka eksamin bad wat hapdeng kiba bun kine ki kynrum kynram. Kane ka jingleh jong ki bor pynïaid ka NEIGRIHMS ka pynartatien ïa ka Seng ba ïoh lehse ka don eiei sha lyndet, la kynthoh ka Seng.
Ha ka dorkhas, ka seng ka la pynpaw ruh ïa ka jinglynngoh halor ka eksamin jong ki Nursing Officer ba la pynlong lyngba ka NORCET -5 examination ba ladep ha kine ki khyndiat bnai, ha kaba ki don 194 tylli ki Post na bynta ki Nurse bad na kine 175 tylli ki post ki la leit sha ki shynrang kiba wan na kiwei pat ki jylla bad tang 17 ngut ki kynthei. Kumba ju long hi ha kiwei kiwei ki Medical Institute ka “Ratio” jong ki kynthei bad shynrang ka dei 80:20 hynrei yn da phai pat sha NEIGRIHMS ka kylla khongpong bad kine kiba la ïoh ïa ka kam, kim shym la don ïa kano kano ka jingtbit (practical) namarba ka NEIGRIHMS kam shym la pan ïa kata bad kane kan buh jingeh ïa ki nongshah sumar kiba wan ban sumar ïa lade ha katei ka jaka.
Ka Seng ka ïai ban biang ruh halor ka Grade B bad C post ba la pynlong da ka Agency ba nabar ba a tip kyrteng kum ka HLL, ba bun na ki samla Khasi ki ngat ban thoh eksam sha Guwahati, Jorhat, Dibrugarh bad Delhi. Kane ka la buh jingeh shibun bah ïa ki samla kiba duna ïa ka jingïoh jingkot bad ka Seng ka lap ruh ba bun na ki samla Khasi kim shym la lah ban leit thoh ïa ka eksamin jong ki.
Ka Seng ka buh jingkylli ba balei ba ka NEIGRIHMS kam lah ban pynlong hi ïa ka eksamin kam bad ka hap ai sha ka Agency kum ka HLL bad ka NORCET bad lyngba kine ngi ïohi ba bun tang ki briew na kiwei pat ki jylla kiba ïoh kam, lehse ka lah ruh ban long ba ki bor pynïaid kiba ha khmat jong ka NEIGHRIMS ki kwah ban pynrung ïa ki briew na ki jylla ki jong ki,” la bynrap ka Seng.
Ka Seng ka kyntu ïa ka Sorkar Jylla ba kan khmih bad bishar bha halor kane ka bynta bad kyntu ba nangne shakhmat ka NEIGHRIMS ka dei ban pynlong hi ïa ka eksamin bad ym dei ban shu ai pateng ha kiwei pat.
Na ka liang jong ka Dr. Ampareen Lyngdoh ka la kular ban shimkhia halor kine ki mat ba ktah ïa ki samla wadkam wadjam jong ka jylla.
