Shillong, Nohprah, 21: Ka Myntri ka Koit ka Khiah jong ka Sorkar Jylla ka Dr. Ampareen Lyngdoh ha ka sngi Palei ka la ong ba ym pat don satia mano mano ruh ba ngat biang ha u khñiang jingpang COVID ha ka jylla ïa mynta.
Ka Myntri ha kane ka sngi ka la lum jingïalang ïa ki Ophisar jong ka tnat ka Koit ka Khiah ban ïapyrkhat halor ka jinglong jingman ha ka ri hadien ba u khñiang jingpang COVID u la sdang ban sar ha ki katto katne ki bynta jong ka ri.
“Kumba ka long mynta, ka World Health Organization ka la pynbna ba la mih pyrthei sa uwei u khñiang jingpang ba thymmai. Watla ïa une u khñiang jingpang ba thymmai la lap naduh kaba sdang jong une u snem hynrei la shem ba na ki dak ki shin um long uba khlaiñbor,’ la ong ka Myntri.
Da kaba pynpaw ba ki paidbah kim dei ban sheptieng, ka Myntri ka la ong ba ka tnat ka Koit ka Khiah ka la peitngor bha lyngba ka Integrated Disease Surveillance Program jong ka tnat ka Koit ka Khiah.
Hynrei, na ka liang jong ki bor ba dei peit ïa ka tnat ka Koit ka Khiah ki la ai jingmut, ha kum kine ki por ba la dei ki aiom lehkmen ba ïalum briew, ki paidbah ki dei ban deng da ki Mask haba ki leit shano shano, ban thet ïa ki kti, bad ban bud ïa ki kyndon ïada katba lah. Kito kiba don ïa ki jingpang kum ka hypertension, diabetes, kidney bad kiwei kiwei, ki dei ban shim lypa ïa ki lad jingïada lada ki ïoh ïa ka jingpang baiong khlieh suhkhriat.
