Shillong, Nohprah, 21: Ka BJP Meghalaya State Unit ha ka sngi Palei ka la mih ban ieng pyrshah halor ki jingkren jong u MP ka TMC u kalyan Banerjee pyrshah ïa u Vice President u Jagdeep Dhankar hapoh ka Parliament bad katba u Kalyan Banerjee u MP uba mihkhmat ïa ka TMC u dang pyrthuh bud ïa u Vice President bad u Rahul Gandhi u nang ring dur hangta.
Ki dkhot ka BJP da kawei ka sur ki la pynrem ïa kane ka kampoh jong ka TMC.
U nongai ktien ba khmat jong ka BJP Meghalaya u Bah Mariahom Kharkhrang u la ong “ngi ïalum hangne ym dei tang kum ka dak jong ka jingpyrshah ïa kaei kaba la jia, hynrei ban pynsngew ha u Vice President jong ka ri India baroh kawei ba ngim sngewïahap bad kane ka jingjia. Baroh ki don ka mon laitluid ban kren na bynta lade hynrei ngi dei ban kynmaw ïa kawei,ba ngi dei ban don nongrim ban kren da ka jingkitkhlieh bad ym ban shu kren klumar ne pyrthuh bud kumba ju leh ka liang pyrshah naka por sha ka por.”
“Ka jingthmu jong ki MP ka Liang Pyrshah ban kren bein ïa u Myntri Rangbahduh ka ri ka pynlong ïa ki dkhot ban kren tam pud ha kane ka kynti. Ka jingmut jingpyrkhat jong ki ka lah poi shaduh u pud ba kim sngewthuh shuh ban pynïapher ïa ka jingpyrshah bad ka jingpynthohbria bad kane ka pynlehrain ïa ka ri hi baroh kawei, haduh ba la i thamula ban peit ne ban sngap,” la bynrap u Bah Kharkhrang.
