Balei ngan lehraiñ ban hiar khynra Trading Licence; kylli kylla u CEM ïa ka Liang Pyrshah

Shillong, Nohprah 21 : U Chief Executive Member ka KHADC, Bah Pynïaid Sing Syiem ha ka sngi Palei u la buhh jingkylli ba kam don ei ei ïa u ban lehraiñ ban hiar ryngkat ki Executive Member ban hiar khynra Trading Licence ha kito ki jaka ba don ka jingkhaii beaiñ ha u pud u sam jong ka Council.
Kane ka jingkren jong u kadei halor ka motion ba la wanrah da ka Liang Pyrshah halor ka rukom treikam jong kane ka Executive Committee ba mynta. Na ka liang u MDC ka Liang Pyrshah u la buh jingkylli ruh kumno ba u CEM bad ki EM ki hiar ban khynra Trading Licence hi watla ka Council ka la don la ka jong ka Enforcement Wing ban trei katkum ka jingbthah jong ka EC.
Da kaba ïada ïa ka jingtreikam jong ka EC, u CEM u la ong ba kane ka sienjam ka long ban khanglad ïaka khaii beaiñ khlem ki kot ki sla kiba biang. “Ngi la hiar ban khynra ym ban pynlehraiñ ïalade hynrei ban pyrshang ban shim ïa ka jingkitkhlieh. Nga kwah ruh ban kyntu ïa ka EC ba thymmai ruh ba kan leh lang kumjuh ban hiar hi da lade khnang ban tip ïa ka daw naduh tynrai namar don ki jaka ba ym don shuh ki Khasi kiba leh ïa ki kam khaii pateng. Kane ka jingleh jong ka EC ka long ban ai mynsiem bad pynshlur ïa ki ophisar ba kin trei shitom shuh shuh ban teh lakam ïa ka khaii beaiñ,” u la ong.
Nalorkata, u CEM u la ïathuh ruh ba ka Enforcement Wing ka duna bha ka jingdon ki nongtrei namar ki don tang 70 ngut ban peit na ka bynta ki san tylli ki distrik hapoh u pud u sam jong ka Council.
Haba ïadei pat bad ka ishu jong ki nongkhaii kiba ujor da ka mukotduma halor ka ishu Trading Licence, u CEM u la pyntip ba mynta kitei ki nongkhaii ki la wan pyndem bad kwah ban pynbeit noh ïa katei ka ishu. U ong ruh ba kum ka EC ki leh ia kane ka kam katkum ka kyndon Trading by Non-Tribal Regulations.