Shillong, Nohprah, 21: Ka Khasi Students’ Union lyngba ka Education Cell hadien ba ka la ïoh ïa ka jingujor na ki samla pule ka jylla ki ban ïakhun ïa ka examine CSIR NET exam 2023 ka ban long ha ka 26 tarik,27 tarik bad 28 tarik mynta u bnai kiba hap ban leit ïakhun ïa kane ka eksamin shabar ka jylla kum sha Jorhat bad Dibrugarh ka seng ka la ïakynduh u Myntri ka Sorkar Jylla uba peit ïa ka tnat Pule Puthi, u Rakkam A. Sangma.
Ka seng hapoh ka jingïalam jong u Assistant Education Secretary ka KSU CEC u samla Shelkitbok Kharbani ka la aiti da ka dorkhas ha u Myntri. Ha kane ka sngi la don lang ruh u Adviser jong ka tnat Pule Puthi ka Sorkar Jylla u Bah Himalaya Shangpliang.
Ha kane ka jingïakynduh ka Seng ka la ïoh ban ïakren bad pynpaw halor kane ka jingeh jong ki samla pule ki ban ïakhun ïa kane ka eksamin.
Hadien ka jingïakren bad ki nongïalam iong ka seng, na ka liang jong u Myntri uba dei khmih ïa ka tnat Pule Puthi u la kular ba un sa shimkhia mardor ïa kane ka kam bad hakhmat jong ki nongïalam ka seng hi u la telephone sha u Senior Director NTA ban khmih bniah ïa kane ka kam bad ban pyntikna ba ki samla pule ka jylla ki dei ban ïoh thoh ïa kane ka eksamin hapoh ka jylla la jong.
