Ka kam pud kam sam ka khlem poi sha ka jingpynkut: K.P Pangniang

Nongstoiñ, Rymphang 6: U kyrtong ka HSPDP Nongstoiñ Bah Sanjied Kynsai Shangrit u la long uwei na ki kyrtong ban pyndep ïa ka jingleit thep kyrteng ïalade na ka bynta ka elekshon MLA ban wan.
Haba kren sha ki lad pathai khubor hadien ba la dep thep kyrteng, u la ong ba ka thong hi ka long ban wanrah ïa ka rukom synshar khaddar kaba khuid ba suba, ka synshar khaddar ka bym noh tarajur lada dei ïa u rit ne u khraw, lane ïa u riewspah bad u ba duk.
U la ong ruh ba ha ka jingïadei bad ka Nongstoiñ Constituency, u angnud ba ki samla kiba dei ka lawei jong ka dong ka thaiñ kin kiew irat shajrong ha baroh ki liang. U dang ong ruh ba ai ba kita kiba dei hok ban ïoh ïa ka kam ka jam lane ïa ki lad jingïarap kin ïoh shwa, ym ban shu jied briew kyrpang lane leh shilliang ïano ïano.
U la ong ba lada ki paidbah ki jied ki mon ïa u ban mihkhmat, ka dei ka kamram jong u ban peit ba ki samla kim dei shuh ban ïa ap tang ka kam sorkar. Hynrei, ban phai sha kiwei de ki lad ki lynti kamai, kata kum ka kam jngohkai pyrthei bad kiwei.
U la ong ruh ba kumba u maieit Hoping u la seng nongrim ïa ka HSPDP ha ryngkat u kpa jong u, ma u ruh kum u khun un ieng skhem ha ka nongrim na ka bynta ban ïada ïa la ka iktiar jong ka ri bad ka jaidbynriew.
U la pynpaw ruh halor ki mat ba u Maieit Hoping u la ieng ïaleh, kita ki long ban dawa Khasi Jaiñtia State ryngkat u pud u sam ba thikna, ban pyrshah tih Uranium, bad kiwei kiwei de ki mat bad ki ishu jong ka jaidbynriew, ïa kaba la buh ha ka manifesto jong ka party lah da ki bun bun phew snem.
U Bah Methodios Dkhar kyrtong HSPDP na Mawshynrut u la ong ba um shym ieng ban ïakhun kyrpang ïano ïano hynrei u ieng halor ka nongrim lyngba ki paidbah ba ki kwah ïa u. U la ong ba haba im ha ka synshar paidbah hi hap ban sngap ïa ka nongrim jong ki paidbah bad kumba long mynta hi, ki paidbah Mawshynrut ki don syndah bad ka party HSPDP. U da sngew skhem ruh ïa ka sur na ki paidbah bad dei na ki paidbah kiba kwah ïa u ban ïaleh na kane ka party.
U la ong ruh ba haba bishar bniah ïa ka nongrim jong ka party HSPDP, ka ïahap tarajur bha ban ïaleh na kane ka party, namar ki nongrim kiba don ha ka, ki long kiba ïa dei dur bad donkam ha kane ka juk kaba mynta. Nalor nangta u la ong ba ka thong hi ka dei kaei kaba ki paidbah ki angnud, kata ka long ka synshar khaddar kaba khuid ka kamai kajih kaba bit ba biang. Lada ïakren ïa ka roi ka par lei lei, ka Mawshynrut ka dang donkam shibun bah ki lad ki lynti lada ka dei ïa ka koit ka khiah lane ka pule puthi.
U President rangbah ka party bah K.P Pangniang hadien ba la pyndep ka jingthep kyrteng, u la ong ba ka jingmih jong u ban mih ïaleh biang ïa ka elekshon ka dei ka jingdawa jong ka Constituency, ka jingdawa jong ka party, ka ri bad ka jaidbynriew.
U la ong ruh ba watla ka HSPDP ka la don ha ka sorkar MDA, hynrei sngewsih ba ïa ka ishu jong ka party kaba ka la ïai tynruh man ka por lyngba kane ka sorkar, kam shym la poi sha ka jingpynkut. Wat ka wat ba nyngkong jong ka jingpynbeit pud ruh dang leh tang khyndiat. Hynrei, ïa ka Langpih lei lei kaba dei ka bynta ba kongsan tam, ym pat shym la lah satia wat tang ban ktah khyndïat ruh. Kaba mut ba ka kam pynbeit pud hi kam shym pat poi sha ka thong.
Ha kaba ïa dei bad ka jingpynïasoh bad ka sorkar thymmai, u la ong ba hap ban bishar bniah kaba kum kano ka sorkar kaba lah ban ïatreilang, kaba ïa hap bad ka manifesto jong ka party, kata ban ïoh ban pyntreikam ïa ki policy kiba ïa dei bad ka jinglong trai ha ka khyndew ka shyiap kumba ki trai muluk ki long trai.