Ym don skhim pynroi na jylla, baroh wan na Central suda: BJP Nongstoiñ
>> Ka AITC ka don ïa ki nongïalam kiba ïohi jngai: Justin G Momin >> Kwah symbol ‘auto rickshaw’ u Francis Pondit na Rambrai
Nongstoiñ, Rymphang 6: U kyrtong shimet na Rambrai kata u Bah Francis Pondit Sangma u la ong ba kumba long mynta hi, jan baroh ki nongkyrshan na ki paidbah Garo ki kwah ïa u ba un jop beit ïa kane ka elekshon, namar ki kwah ba un ai ka jingshakri kaba khambha na ka bynta jong ki.
U la ong ruh ba u angnud ban ïoh ïa ka symbol helicopter, auto rickshaw hynrei napdeng kine u kwah hi da ka auto rickshaw ban long ka symbol ha kane ka elekshon ban wan. U la ong ruh ba wat ki paralok khasi na Rambrai ruh kum na Nongtrai, bun kiba kyrshan ïa u bad u kyrmen ban jop ïa ka elekshon. U nongïaleh pyrshah ïa u dei u Bah Kimfa Marbaniang.
Na ka liang u Bah D.Jyndiang na ka party BJP u la ong ba bun na ki skhim dei hi kiba la wanrah beit na central ban pyntreikam hapoh ka jylla. Hynrei ka jylla ka shu ap beit katba phah na Delhi. U la ong ruh ba ka party na Nongstoiñ ka la pyrshang ban ai jingmut sha ka state level halor ki 9 tylli ki mat kiba kongsan na ka bynta ka ri bad ka jaidbynriew. Nalor nangta u la ong ruh ba ha ka jingïadei bad ka jingngeit niam, ka BJP hi ka ai laitluid sha baroh ban mane Blei katkum ka jingmon jong ki nongshong shnong.
U Bah Justin G Momin kyrtong na ka AITC u la ong ba ka Mawshynrut ka dei ka Constituency kaba la shu ieh shrah da ki bun phew snem, lada ïa nujor bad kiwei pat ki constituency. Ki samla bad ki nongrep ki mad ki jingeh, namar ym don ba phai khmat sha ki.
Halor kine ki jingeh u ong ba ka AITC ka shim mynta ïa ka jingkitkhlieh ba lada kan jop bad wan ha ka bor, kan peit kyrpang ïa kine ki jingeh jong ki paidbah Mawshynrut. U skhem ruh ïa kane ka party hapoh ka jingïalam kaba stad kum u Dr Mukul Sangma uwei na ki nongïalam ba stad hapoh ka jylla, ba ka lah ban ai ka lawei ba phyrnai na ka bynta ka jylla hi baroh kawei.
U Bah Bobby Kharshandi kyrtong party Voice of the Peoples Party, u la ong ba ka jingangnud ka long ban wanrah ïa kata ka synshar kaba khuid, ka jingsynshar kaba ym noh shilliang shano shano hynrei kaba ai jinghun sha baroh ki paidbah, kata la ka long ha Nongstoiñ Constituency ne wat ha ka jylla hi baroh kawei.