Nongstoiñ, Naiwieng 01: Ha ka sngi palei jong ka taïew ba la dep u bah Prestone Tynsong Symbud Myntri Rangbah ka jylla u la hiar sha ka shnong Tynghor ban pynlong ïa ka jingïalang paitbah na ka bynta ban pynshai paitbah halor ka Election MP shiteng samoi elekshon na ka bynta na ka bynta u Dr. DRL Nonglait bad ha katei ka jingïalang la ïadon ryngkat ruh da u bah R.G.Momin MLA , u bah Lurshai Kharbani MDC ka Rambrai Jyrngam constituency.
U Symbud Myntri Rangbah haba kren ha katei ka jingïalang u la kham ban ha kaba ïadei bad ka Rimuliang C&RD Block da kaba ong ba naduh 2018 haduh ong ba wanrah pynban ïa ka jingïashrut jingplie jong ka sokar ïa Rimuliang C &RD Block ka sorkar ka la dep pyrkhat sani bha ban don noh artylli ki Block ha Rambrai Jyrngam constituency bad ha u snem 2022 la pynurlong ïa katei ka jingthmu.
Nalor kata u la ong ruh ba ka sorkar ka la bthah ïa u Excecutive Engineer ban sorbe ïa ka surok na Langpih sha Tynghor ka ïaid lyngba ka Ïewnongma, Nongmawleiñ, Mawsngi haduh Tynghor khnang ba kan pynsuk ïa ki paitbah haba ki leit don kam ha Block ophis kaba yn sa tei ha ka shnong Tynghor.
Kumta na ka liang ki nongïalam ka Joint Action Committee Rimuliang C& RD Block kaba kynthup ïa bun phew tylli ki shnong hadien ba ki la ïohi ïa ka jingkren jong u Symbud Myntri Rangbah kaba la saphriang ha ki rynsan social media ki la wan ban ïakynduh ïa u nongthoh khubor jong u Mawphor bad la ïoh ban ïakren sani halor katei ka mat ba u Symbud Mynti rangbah u la kren ha katei ka jingïalang.
Ha kaba ïadei bad katei ka mat na ka liang ki nongïalam ka Joint Action Committee Rimuliang C&RD Block ba kynthup ïa u bah Trasdingland Nonglang President, Bah Ailand Lyngdoh secretary bad kiwei kiwei ki nongkitkam ba hakhmat ki la pynpaw ïa ka jingsngewlyngoh kaba khraw bad ki la pynrem jur ïa katei ka jingkren lap lah jong u bah Prestone Tynsong da kaba ong ba yn tei ïa ka Block ophis jong ka Rimuliang ha ka shnong Tynghor.
Ha kajuh ka por ki la buh jingkylli ïa u bah Prestone da kaba ong ba ha ka 22 tarik Naiwieng 2022 u bah Prestone Tynsong haba u kren ha ka jingïalang paitbah jong ka jing wan buh maw nongrim bad plie ïa ka Rimuliang C &RD Block ha ka shnong Noglang u la ong ba ka shnong Nonglang ka dei kaba biang tam ban buh ïa ka Block ophis jong ka Rimuliang namar ka surok bad ki lynti synkien ki la biang hynrei mynta u la kylla jutang da kaba ong ba ka shnong Tynghor ka dei kaba biang tam.
Nalor kata ki la ong ruh ba katei ka jingkren jong u ka la nag pyningkhong shuh shuh ïa ki nongïalam ka Joint Action Committee Rimuliang C &RD block bad ki paitbah nongshong shnong kiba kwah ba ka Block ophis ka dei ban don ha shnong Nonglang. Shuh shuh ki nongïalam ka JAC RC&RD Block ki la ong ba u bah Prestone u dei ban pyrkhat bunsien shuwa ban kren namar lada ka dei ka jingïalang na ka bynta ban ïalap election ïa u kyrtong MP shiteng samoi um dei ban shu padiah klumar bad ban pynbiej ïa ki paitbah ka thaiñ Tynghor namar ïa ka Rimuliang C & RD Block la dep plie ha shnogn Nonglang bad ka jingtrei kam ruh ka la ïaid la laisnem tam haduh mynta te kumno pat un dang leit kular ban tei ïa kaBlock ophis ha shnmong Tynghor.
Kitei ki rangbah ki la ong ruh ba u bah Prestone Tynsong u dei ban kynmaw ba la arsien arwat ka JAC ka la pynlong da ki jingïakhih pyrshah hadien ba ka sorkar ka la don jngthmu ban pynkynriah ïa ka Block ophis sha Tynghor ha kaba ha ka jingïakhih ha ka sien ba ar ki la tur syndon sha ophis jong ka Deuty Commssioner ha Nongstoiñ bad ki la dep kren lypa ba lada ka sorkar kan pynkynriah ïa ka Block ophis na Nonglang sha Tynghor ka JAC kan sa shim sa da kiwei pat ki sienjam kiba kham ty7ngeh bad ha kata ka por wat ka ophis jong ka Deputy Commssioner ka lah ban pluh.
Kaba kham pynsgew sih shuh shuh ka long ba lada ka sorkar kan pynkynriah ïa ka Block ophis sha Tynghor ka jingïashrut para nongshong shnong kan jur bha bad ki lah ban mih ruh ki jingjia ki bym sngewtynnad ha ka imlang sahlang, ka jingïapeit khmat iwei ïa iwei.
Ha kajuh ka por ki la ong ba ka jingthmu jong ka sorkar ban pynkynriah ïa ka Block ophis sha Tynghor ka dei ka jingkynshoit bad don kti lang jong u bah R.G.Momin MLA ka Rambrai Jyrngam namar lada ka Block ophis ka don ha Tynghor kan pynsuk ïa ki pait nonghsong shnong kiba dei ki Garo.Khatduh eh ki la ong ba u Conrad Kongal Sanmgma Myntri Rangbah ka jylla bad u bah Prestone Tynsong Symbud Myntri rangbah ki dei ban pyrkhat bniah bad sani bha namar lada jia kano kano ka jingeh ka JAC kan ym kitkhlieh satia.
