Hiar shuki hi ne shah buh por u Bah Metbah, mih ki jingkylli halor ka jingsah marwei ha ka UDP

Shillong, Naiwieng: Hato ka jinghiar shuki jong u President ka United Democratic Party (UDP), u Bah Metbah Lyngdoh, na ka Kynhun Myntri ka Sorkar Meghalaya ka dei shisha kaba u la rai da la ka mon, ne u la poi ha ka khep bym don shuh da kawei pat ka lad ban jied, hadien ba la kynnoh ba u Myntri Rangbah, u Conrad K. Sangma, u la buh por khatduh ïa u ban hiar shuki?
Ki tyllong khubor kiba bniah halor kane, kynthup ïa kiba napoh ka UDP hi, kibym kwah ban pynpaw kyrteng, ki la kam ba u Myntri Rangbah u la buh por ïa u Bah Metbah haduh ka 2 tarik u Naiwieng, 2026, ban hiar shuki noh kum u Myntri, lym kumta un sa shah weng na ka shuki.
Ki tyllong khubor ki la ong ba dei kane ka jingbuh por kaba la pynlong ïa u Bah Metbah ban aiti kyrkieh ïa ka shithi iehnohkam ha ka 31 tarik u Risaw.
Katkum kine ki tyllong khubor, hadien ba ki 8 ngut ki MLA ka UDP ki la ïasoh bad ka BJP ha u Nailur, la don katto katne ngut kiba la ai jingmut ïa u Bah Metbah ba un hiar noh ym tang kum u Myntri hynrei wat na ka shuki President jong ka UDP. Hynrei la ïathuh ba um shym la sngap ne pdiang ïa kine ki jingai jingmut.
Dei tad hadien ba u la ïoh jingtip halor ka jingthmu, kaba la kynnoh, ban weng noh ïa u na ka Kynhun Myntri, ba u Bah Metbah u la leit ïakynduh ïa u Myntri Rangbah bad pynkynmaw ïa u halor ka bynta kaba kongsan jong ka UDP ha kaba kyrshan bad pynneh ïa ka sorkar ba la ïalam da ka NPP, khamtam ha ki por kiba ka sorkar ka la ïakynduh ïa ki jingeh.
Ki tyllong khubor ki la kam ba u Conrad u la buh jingkylli kumno ka UDP kan dang lah ban pynshongnia ïa ka jingdon jong u Myntri na ka seng ha ka Kynhun Myntri, haba ka jingdon jong ki MLA jong ka ka la hiar na ka 12 ngut sha satang uwei, katba kiwei pat ki seng kiba donlang ha ka sorkar synrop ki don ym duna ïa ka 2 ngut ki MLA.
La ïathuh ruh ba u Myntri Rangbah u la ai jingmut ïa u Metbah ba kan kham bha ïa u ban hiar shuki noh da la ka mon, ban ïa kaba u shah pynhiar shuki.
Hynrei na ka liang u Bah Metbah, ha ka jingïakren bad ki lad pathai khubor u la kyntait bad pynksan ba ka jinghiar shuki jong u ka dei ka rai kaba u la shim da la ka mon, ym namar ba don ka jingpynbor na kino kino.
Nalor ki jingkylli kiba mih halor ka daw tynrai jong ka jinghiar shuki, la mih ruh ki jingkylli kiba khia halor kumno kawei ka seng saiñ pyrthei kaba la long ka seng kaba ar ha ka jingheh paid ha Meghalaya ha ka ilekshon 2023, ka la duh noh haduh 11 ngut na ki 12 ngut ki MLA, hapoh ka jingïalam jong u President jong ka hi.
Kawei na ki tyllong khubor ka la kynnoh ba watla u Bah Metbah u la bat ïa ka shuki Myntri ha ka Kynhun Myntri, hynrei bunsien um shym la shimkhia, ïarap ne tuklar ïa ki kam kiba ïadei bad ki constituency jong ki para MLA ka UDP, wat haba ki la pan ïa ka jingïarap jong u.
“U la ïai long Myntri sorkar, hynrei kaei ka jingmyntoi kaba kiwei pat ki MLA ka UDP ki la ïoh na ka jingdon jong u President ka seng lajong hapoh ka Kynhun Myntri?” la buh jingkylli kane ka tyllong khubor.
La kynnoh ruh ba u Metbah u kham pynleit jingmut ïa ki jingthmu saiñ pyrthei jong u hi, ban ïa kaba mihkhmat bad ïasaid ïa ki jingmyntoi ba ïasam lang jong baroh ki MLA ka seng.
La mih ruh ki jingkylli halor ka rukom treikam bad ka jingpynïaid ïa ki kam hapoh ka UDP, khamtam halor ka jingpynslem ïa ka ilekshon ban jied ïa ki nongkitkam jong ka seng. U General Secretary barim, u Bah Jemino Mawthoh, u la iehnohkam ha u Jymmang 2025. Hadien kata, u Bah Titosstarwell Chyne u la shah jied kum u General Secretary da ka Central Executive Committee ha u Nailar jong kajuh ka snem. Hynrei ki jingbynñiaw ki dang ïai neh halor ka jingbym lah jong ka seng ban pynlong ïa ka ilekshon jied nongkitkam thymmai, wat hadien ba la palat shisnem naduh ka jingpynkylla ïa ka Kynhun Myntri ha u Nailur 2025.
Ka jingnang jngai bad jingbym ïasngewthuh jingmut hapdeng ki nongïalam bad katto katne ngut ki rangbah saiñ pyrthei jong ka seng ka la nang pynjur shuh shuh ïa kine ki jingbynñiaw.
U rangbah uba la ih bha ha ka saiñ pyrthei bad uba long ruh uwei na ki nongseng ïa ka UDP, u Bah Bindo M. Lanong, uba khlem ïoh tiket na ka seng ha ka ilekshon 2023, u la mih paidbah ban kynthoh ïa ka jinglong nongïalam jong u Bah Metbah, bad pynkit ïa ka jingbahkhlieh halor jong u na ka bynta ka jinglong jingman ba mynta jong ka seng.
Hynrei balei ïa kine ki dak orpait kiba la sdang paw lypa la kham slem ym shym la shimkhia ne wad lad ban pynbeit?
Balei ka jingïalam jong ka seng kam shym la lah ban khanglad ïa ka jingmih noh jong ki 8 ngut ki MLA sha ka BJP, bud sa ki 3 ngut sha ka NPP?
Bad balei u President u dang ïai bat ïa ka shuki wat hadien ba ka UDP ka la duna bor haduh ba la sah tang uwei u MLA hapoh ka Ïingdorbar Thaw Aiñ?
Kawei pat ka jingjia kaba kham phylla ka long ka bynta jong u Bah Lahkmen Rymbui. Ha u Nailur 2025, u Bah Lahkmen Rymbui bad u Bah Metbah Lyngdoh ki la mih bujli ban shimti ïa ki shuki Myntri ha ka jaka jong u Bah Paul Lyngdoh bad u Bah Kyrmen Shylla. Hynrei tang shisnem hadien, u Bah Lahkmen Rymbui hi u la kylla long u nongïalam jong ka kynhun ki 8 ngut ki MLA ka UDP ban pynïasnoh noh ïalade bad ka BJP.
Watla ka rai saiñ pyrthei jong uwei pa uwei u MLA ka lah ban don la ki jong ki jong ki daw bad ki jingpyrkhat, hynrei ki tyllong khubor kiba kynthoh pyrshah ïa ka jingïalam jong u Bah Metbah ki dang pynskhem ba ka jingbym lah jong u, kumba la kynnoh, ban pynneh ïa ka jingïasngewthuh jingmut, ban pynbeit ïa ki jingeh bad jingbymhun, bad ban ïada ïa ki jingmyntoi ba ïasam lang jong ki MLA ka seng, ka la long kawei na ki daw kiba kongsan kiba la pynlong ïa ka UDP ban hiar arsut.
Na ka liang u Bah Metbah, um pat shym la pdiang ïa ka jingbahkhlieh halor ka jingmih noh jong ki MLA na ka seng. U la pynskhem ba ka jinghiar shuki jong u na ka Kynhun Myntri ka dei ka rai kaba u la shim hadien ka jingpyrkhat sani bha ïa ka jingkylla jong ka saiñ pyrthei. U la ong ruh ba ka Central Executive Committee jong ka UDP kan sa shim ïa ka rai halor ka lawei jong ka jingïadei hapdeng ka seng bad ka sorkar MDA.
Mynta ba ki 11 ngut ki MLA ki la mih noh bad ba u Bah Metbah u la sah marwei kum u nongmihkhmat ka UDP hapoh ka Ïingdorbar Thaw Aiñ, ka jingkylli kam dei shuh tang balei ki MLA ki la mih noh, hynrei ka dei ruh balei ym shym la lah ban khanglad ïa ka jingmih noh jong ki, ne ka dei ka jingshimsting kaba la pynlong syndon ïa ka seng kaba ar ha ka jingbunpaid ban sah beit thik tang marwei.