KA JINGSHAH PYNÏAP BA SHYRKHEI u rangbah : Nalor ka khlieh, lap ki Pulit sa ka kti ka bynta ka met u briew ba la tep harud ka pung Umïam

Nongpoh, Lber 09: Hadien 2 sngi bala lap ïaka khlieh briew harud ka pung Umïam kaba la pynpar ñïangkhriat bad pynngiew ïa kiba bun balang, ki bor pulit jong ka Ri-Bhoi haka jingïatreilang bad ka tnad Crime Unit jong ka jylla mynta ka sngi kila leit ban tam pat sa ïa ki bynta jong ka met u briew bala pynthikna ruh da ki bahaïing bad ka shnong ba kitei ki bynta jong ka met bala lap na pung Umïam ki dei u juh u briew bad ka khlieh kaba la lap hashuwa, bala suba jur ba dei ka jingpynïap dusmon jong ki runar ha kaba ïa ka met la tep ha khyndew harud ka pung bad ïaka khlieh bad kti lah bret sha pung Umïam
Naka liang ki bahaïing hasem mynta ka sngi kila leit ruh ban pynthikna ïa ki bynta jong ka met haka jingdonlang ki bor pulit, ba utei u ba la shah pynïap la tip kyrteng kum u Omega Myrthong naka shnong Mawlaingut, East Khasi Hills, u ba don ruh 5 ngut ki khun bad iwei iba dang shi bnai, bad katkum ka jingtip na ki bahaïing utei u rangbah u la jah nala ïing naduh ka 26 tarik u bnai Rymphang, bad hadien ka jingpyntip jong ki bahaïing sha ka shnong, naka liang ka shnong kala ujor da ka ejahar sha Lumdiengjri Police Station ban buddien ïa utei u rangbah, hynrei khlem lapdien satia, bad utei u rangbah u dei ruh u dkhot jong ki nongñiah kali kamai na Shillong sha Nongpoh.
La suba ruh ba ka rukom pynïap ïa utei u rangbah kala long kaba itriem bad shyrkhei, ha kaba ki runar kila khrai khlieh, kila khet ruh ïaka kti lakajong bad hadien ka jingpynïap ki runar ki leit pat ban bret ïaka khlieh bad kti ha pung Umïam bad tep pat ïaka met harud katei ka pung.
Hadien bala lap ïaka met bad ki bynta na pung Umïam naka liang ki bor pulit ryngkat ki bahaïing hasem kila rah noh ïaka met sha Civil Hospital Nongpoh, bad pynkit biang sha Nongbah Shillong ban leh ïa kaba donkam katkum ki kyndon aiñ.
Naka liang u Bah Saiñdor Nongbsap, Secretary ka shnong Mawlaingut u la ong ba hadien ka jingjah jong utei u rangbah, kum ka shnong bad ki bahaïing kila pyrshang ban leit wad hynrei kim lap satia wat hadien bala ujor da ka ejahar, tad haduh bala lap syndon ïaka khlieh bad ki bynta jong ka met ha Pung Umïam bala wan pynïap bad bret dusmon da ki runar.
Utei u nongïalam shnong, u la ong ruh ba utei u rangbah, u dei u briew uba bha bad ba um don kano kano ka dak sniew ha shnong ha thaw, namar u dei u briew uba kloi ban ïatreilang bad ki bor shnong bor thaw, hynrei khlem tip na kaei ka daw ba ki runar ki hap ban pynïap dusmon wat ban ot lyngkhot lyngkhai ïaka met.
Na ka liang ka shnong kala pynrem jur ïa ki runar ba donkti ha katei ka kam pynïap briew bad dawa ruh ïaka tnad pulit ban shimkhia ban buddien bad thwet ïaki runar ryngkat ka jingpynsajia kaba tyngeh khnang ba kum kitei ki jingjia kin nym jia shuh hadien habud.
Naka liang ki bor pulit kila shimkhia ban leh ïa kaba donkam ban pynlong ka jingtohkit ban lap ïaki runar ba donkti ha katei ka kam.