Ka kham jwat shiphew shah ban ïoh Visa sha Israel ban ïa ka ILP: Paul Lyngdoh

0

Shillong, Lber, 09: U Myntri ka Sorkar Jylla u Bah Paul Lyngdoh uba long u MLA jong ka West Shillong Constituency ha ka sngi Palei u la kdew ba ki saw tylli ki tnat treikam kiba kynthup ïa ka Social Welfare, ka Tourism, ka Arts & Culture bad ka Textile, ki long kum ‘kawei ka song’ namarba ki don ïa ka jingïadei bad ki dei ki kam kiba hakhmat eh na ka bynta jong u.
U Bah Paul Lyngdoh uba long ruh u nongïalam jong ka United Democratic Party u la ong ba ka donkam ïa ka Sorkar MDA ban kham ïaiban ïa ka jingdawa ban pyntreikam noh ïa ka Inner Line Permit (ILP) haba ai nuksa ruh ïa kiwei pat ki ri kum ka ri Israel kaba wat hapdeng ki jingpyrkhing kiba jwat hynrei ka dei pat ka ri kaba ki briew na kylleng ki ri ka pyrthei ki kham sngewtynnat ban leit iuhkjat.
“Baroh kine ki tnat ki dei ki bynta kiba kongsan bad kiba don ka jingïadei. Lada phi phai sha ka tnat Tourism ka don ka jingïadei bad ka tnat Arts and Cultre, ka don ka jingïadei sha ka tnat Social Welfare bad ka don ka jingïadei bad ka tnat Textiles. Namarkata kine ki saw tylli ki tnat ha ka jingshisha ki dei kawei ka song,” ong u Bah Paul haba ïakren bad ki lad pathai khubor.
Haba pynpaw ba ka thong jong u ka long ban kyntiew ïa ka lawei jong ka jylla, u Bah Paul u la ong, “ka Meghalaya ka dei ka jylla kaba la kyrkhu. Ngi dang ïai bteng ban long kiba duk ha ka ri kaba riewspah. Balei ngim lah ban long kiba riewspah haba ngi im ha ka ri kaba riewspah. Balei ngi don bun kiba ïoh duna ka bam, bun kiba duna ha ka ïoh ka kot, balei? U Blei u la ai palat ha ngi, ai ba ngin pyndonkam hok ïa kaba ngi don kum ka jngohkai pyrthei, manla kawei pa kawei ka longiing ha Meghalaya ka dei ban biang ha ka kamai kajiih namar ka jingdon jong ka jngohkai pyrthei. Balei ngi ong ba ngi sahdien bad ngim ïohbam, ha kano ka rukom, balei, ka dei ka thong kaba nga kwah ban kham pynleit jingmut mynta.”
Ha kaba ïadei bad ka jingsahdien jong ka Jylla ha ka jingpynïasnoh da ka liengsuiñ bad kiwei kiwei ki jingtei kiba kongsan ban kyntiew ïa ki kam jngohkai pyrthei, u Bah Paul u la ong, “ki jingtei kiba kongsan ki dei ban don. Mynta ka thong jong nga ka long ban pynïasoh ïa kiba thylli.”
Haba kyntait ban mynjur bad kito kiba kynnoh ba ka ILP kan long u mawjynthud ïa ki jngohkai pyrthei ha Meghalaya, une u Myntri ka tnat Jngohkai Pyrthei u la ong, ‘ban ïoh ïa ka Visa na ka bynta ban leit sha ka ri Israel kan kham jwat shiphew shah ban ïa kaba ïoh ïa ka ILP hynrei jar la katta ka ri Israel ka khring byllai ki nongjngohkai pyrthei.’
“Nga la shang sha Israel. Ka long kaba eh ïa uno uno ban leit sha Israel bad ban rung sha Israel. Ka dei ka ri kaba khring bha ïa ki nongjngohkai pyrthei. Ka ri Israel ka dei kaba pyrkhing bha hynrei ka la khring bha ïa ki nongjngohkai pyrthei bad ban ïoh ïa ka Visa sha Israel ka long kaba jwat shiphew shah ban ïa ka ILP lane ïa kino kino ki aiñ kiba phi kwah ban wanrah. Ka long kaba jwat pynban ki paidbah ki pyrshang ïa kaba bha tam,” ong u Bah Paul.
“Ka long kaba shai tyngkreiñ ba ïa ka ILP la pdiang bad mynjur ha ka dur jong ka rai da ka Ingdorbar Thawaiñ jong ka Jylla bad nga ngeit ba ka long kaba donkam ban ïai pynkynmaw da ka Iingdorbar, da ka Kynhun Myntri bad ban ïaid beit shakhmat,” ula ong.
Kum u Myntri ka tnat Social Welfare, u Bah Paul ula pynpaw ruh ïa ka jingsngewkhia ïa ka jingjyllei jong u drok ha ka jylla.
“Kane ka dei ka kam kaba sngewkhia bha. Ki samla lud jong ngi ki long ka thymmei jong ka bor bad lada phi pyni ïa ki ïa ka lynti kaba dei bad ka lynti ba beit kan long kum ka um kaba tuid, ka um kaba lah ban long ka tyllong pynmih bording bad lada ym lah ban ïada ïa ka um kan wanrah ïa ka jingshlei um bad ka jingtwa khyndew. Wei haba ïa ka bor la pyndonkam sani bha ki samla jong ngin kin sa kiar shisyndon na u drok,” u la ong.
Ha kaba ïadei bad ki thei nuti, u Bah Paul u la ong, “ngi hap ban phaikhmat ruh ha kane ka kam. Ka dei ka mon laitluid kaba ym don mano mano ruh ba kwah ban ïa kyrsum lang ha kum kane ka kam. Ki briew ki shah khynñiat sha kane ka kam namarba ki donkam ban pynkdang ïa la ka kpoh bad ïa ka ing ka sem hynrei ym dei ba ki shu leit mon sngewbha da lade hi lane ba ki shah khring ha kane ka jait kam.
Haba kylli u Bah Paul u la ong, “ki don borabor ki jinghikai ba hap ban bud ha ka jingim bad lada phi shim ha ka rukom kaba ïaroh ïalade da lade lane phi dei ban sngewthuh ïa ka jingshisha ba kane ka kynhun Myntri ka don ïa kiba la tbit bha bad kiba la biang ka kyrdan jingnang jingstad nalor kata kaba nga ju ïai ban borabor ïa ki 3E – experienced, education and ethics- haba phi kyllum lang ïa kine lai tylli hajuh kan ym don kano kano ka jingbakla.”

Leave A Reply

Your email address will not be published.