Shillong, Lber 09 : Ka Khasi Hills Autonomous District Council hapoh ka jingïalam jong u Bah Titos W Chyne khatduh ka la lah ban pynkut noh ïa ka kam Acting Syiem ha Hima Mylliem kaba la neh mynta la kumba 7 snem ei ei bad ïoh ban jied pat da u Syiem uba pura.
Kumta, ha kane ka sngi Palei, u CEM ka Council u la aiti ïa ka Sanad ha u ‘Paiem Ainam Manik Syiem ban pynskhem ba u la dei u Syiem ba pura ba la jied hi da ki Myntri bad ki Bakhraw jong ka Hima Mylliem ha ka jingïalang kaba long ha ophis treikam jong ka Hima ha Mawkhar.
Ha kane ka sngi la donlang ruh u Executive Member ka tnad Elaka, Bah Jambor War, kiwei ki EM ba kynthup ïa ka Kong Macdalyn Sawkmie Mawlong, Kong Grace Kharpuri, Bah Rangkynsai Kharbuki bad ruh u Bah Pynïaid Sing Syiem nalor ki Myntri bad ki Bakhraw jong ka Hima.
Na ka liang u CEM haba kren ha kane ka sngi u la pynpaw ïa ka jingkmen ba watla ka shim por slem bha, hynrei kane ka Executive Committee pat ka la lah ban pynkut noh ïa ka kam Acting Syiem bad ban ïoh da u Syiem uba pura.
Ha kajuh ka por na ka liang kiba bun ki nongkren kynthup na ka liang u Syiem bad ki Myntri la pynpaw ïa ka jingkmen kaba khraw ïa ka jingshimkhia jong ka Council hapoh ka jingïalam jong u CEM bad ka Executive Committee ban pynstet ïa katei ka kam.
