Hadien bym ïoh shuki Myntri ne Lamphang da ka kam Chairman ka Planning Board ïoh u Bah Metbah

0

Shillong, Lber 09: U President ka United Democratic Party (UDP) uba dei ruh u lamphang barim ka Ïingdorbar Thawaiñ ka jylla y Bah Metbah Lyngdoh un sa khlieh ïa ka State’s Planning Board kum u Chairman jong ka.
Haba pyntip ïa kane u Myntri Rangbah ka jylla u Conrad K Sangma u la ong ba ka hukum ïa kane yn sa pynmih shen ha ki khyndiat kynta.
U Myntri Rangbah u la pyntip ba na ka liang jong u u la ïoh ka shithi na ka Bharatiya Janata Party bad ka Hills State People’s Democratic Party ha kaba ïadei bad ka jingïasam ba marshiteng ïa ka shuki myntri hapdeng ki arngut ki MLA jong ka.
Lah ban kdew hangne ba ka UDP ka la ïoh tang ar tylli ki shuki myntri ha ka sorkar MDA 2.0 kaba kham duna shibun shah ban ïa u 2018 ha kaba ha utei u snem ka UDP ka la lah ban jop tang 6 seat hynrei ka la ïoh myntri haduh 3 tylli ki shki myntri ryngkat ïa ka shuki Lamphang katba ha kane ka kynti kaba mynta wat la ka la lah ban jop haduh 11 ngut ki MLA ka la ïoh tang ar tylli ki shuki myntri bad kam shym la ïoh shuh wat ïa ka shuki Lamphang ruh.
Haba ïadei bad ka UDP Myntri Rangbah u la ong ba kam don kano kano ka jingïakren ha kaba ïadei bad ka jingsam ïa ka jingïalong Myntri marmar shiteng hapdeng ki MLA jong ka.
“Kane ka dei ka kam poh ïing ka UDP bad kim shym la ai ktien ïa nga halor kane ka bynta, hynrei na ka liang ka HSPDP bad ka BJP ki la dep ai ktien ïa nga halor ka jingsam shuki myntri ba marmar shiteng,” ong u Conrad.
Lah ban kdew hangne ba ka UDP ka ïoh ar tylli ki shuki Myntri katba ka BJP bad HSPDP ki ïoh marmar shiteng.
U la ong ba na ka liang ka NPP kan sa shim ïa ka rai ha kaba ïadei bad ka jingsam ïa ka shuki myntri ba marmar shiteng hapdeng ki MLA ynda ka ïa ka la pura ban ïakren.
Shuh shuh u la ong ba ka dei ka jingshisha ba kiba bun ki MLA kiba jop bad kiba don ha ka sorkar ki dei na Garo Hills, “kumba nga la ong ba saw tylli ki shuki myntri ka leit sha ki MLA na Garo Hills bad 8 sha Khasi Hills bad Jaintia Hills hynrei na ka liang jong u u pyrshang ban pynïabiang katba lah haba ïadei bad kane”.

Leave A Reply

Your email address will not be published.