Ka jingjop lyngba ki jinghikai suhjaiñ ka Dalmia Bharat Foundation bad ka USHA ha ki thaiñ nongkyndong

Shillong, Lber: Ka Dalmia Bharat Foundation (DBF), ka dei ka shnat treikam kaba khmih ban kyntiew ïa ka imlang ka sahlang jong ka Dalmia Bharat Ltd. (DBL) ha ryngkat ka jingïatreilang bad ka USHA International jong ka ‘Silai School’ kaba iarap ban kyntiew ïa ki longkmie bad ki kynthei ha ki kam suhjaiñ ka la lah ban aijingïarap ïa kumba 100 ngut ki longkmie kiba wan na ki longïing kiba duna ha ka ïoh ka kot ha ki thaiñ nongkyndong ha Assam bad Meghalaya.
Ha kane ka prokram ba la pyntreikam ha Jagiroad (Morigaon), Lanka (Nagaon) bad hapoh Lumshnong (East Jaiñtia Hills) la sakhi ïa kiba bun ki nongwan shah hikai kiba la lah ban ïeng hala ki jong ki kjat lyngba ka kam suhjaiñ.Ka Binda Lama na Hawaipur, West Karbi Anglong, Assam ka dei kawei na ki nuksa napdeng kiba la ïoh pdiang ïa kane ka jinghikai bad kaba la ïoh ruh ïa ka jingjop kum ka nongsengkam lajong bad don mynta la ka jong ka dukan suhjaiñ bad ka jaka aijinghikai.Ka jingïohkamai ka jong ka man la u bnai ka long hapdeng ka 8000 haduh 15000 hajar tyngka na ka kam suhjaiñ, bad ka la aijinghikai ruh ïa ki 13 ngut kiwei pat ki longkmie hapoh ka shnong ka jong ka.Dang shen ka la ïoh pdiang ïa ka syrnot jing ïaroh bad ka jingaikhublei na ki bor pynïaid ka Dalmia Cement Lanka plant namar kane ka jingjop kaba ka la ïoh ha kane ka bynta.
Ka DBF ka la sdang ïa ki prokram ban aibor ïa ki kynthei ha kiwei pat ki shnong kiba marjan, bad ban rat dyngkhong ïa ka jingduk lyngba ka jingkyn tiew ha kaba ïadei bad kane ka kam suhjaiñ. Ka prokram aijinghikai kaba hynñiew sngi kynthih ka kynthup ha kaba ïadei bad ka kam suhjaiñ kumjuh ki buitsuhkti na ka bynta ki longkmie, kata nalor ka jinghikai ban pyndait, ban maramot bad kumno ban pynkhuid ïa ki kor suhjaiñ. Nalor kata kine ki nongwan shah hikai ki ïohpdiang ruh ïa ka jingïarap pisa na ka DBF kumjuh na ki kynhun seng kiba ïoh jingmyntoi na ka thaiñ na ka bynta ban thied ïa ki kor suhjaiñ.Ha ka jingïatrei-lang halor kane ka bynta, ka Usha International ka la pynïoh ïa ki jinghikai ban tip bad shemphang ïa ki buit kiba ïadei bad ka jingai jinghikai, ki jingthmu, ki jingïatrei-lang bad ka jingpyn-treikam ïa ka prokram. ïa mynta hi lyngba kane ka prokram la ai jinghikai sha ki 10 ngut ki longkmie ha Meghalaya ha kaba ïadei bad kane ka kam suhjaiñ.Na ka liang ka DBF ka don ruh ïa ka jingthmu ban nang-kyntiew shuh shuh ïa kane ka prokram ha ki bynta bapher bapher jong ka thaiñ shatei lammihngi (North East).
U nongaiktien ka Comapny ka DBF u la ong; “Ka jingthmu ha kaba pynlong ïa kane ka prokram ka long ban btin lynti ïa ki longkmie kiba wan na ki longïing kiba duna ha ka ïoh ka kot ba kin lah ban kyntiew ha ka kamai kajih lyngba ka kam suhjaiñ hapoh ki shnong ki thaw, ban ïarap ïa ki ba kin long kiba shaniah ha lade ban pynbit pynbiang ïa ki jingdonkam hala ki jong ki ïing ki sem.
Ngi sngewkmen ban ïoh ïa ka jingjop hapdeng kito kiba la ïoh ïa ka jinghikai bad ngi sngew sarong halor ka jingjop ka jong ki. Ngi kyrmen ba kine ki khana aijingmynsiem jong ki kin pynshlur shuh shuh ïa kiwei pat ki longkmie hapoh ki shnong ki thaw ki jong ki bad ba kin wan ïashim bynta ha kiba kum kine ki prokram aijinghikai suhjaiñ ha ki sngi ki por ki ban dang wan.Ngi sngewnguh shibun ia ka USHA International halor ka jingkyrshan ka jong ki ban pynlong ïa kine ki prokram aijinghikai ki jong ngi kiba jop.”
Ka Dalmia Bharat Foundation kala ïai bteng ban trei na ka bynta ban kyntiew ïa ka ïoh ka kot hapdeng ki nongshong shnong ha ki jaka nong kyndong jong ka thaiñ North East.Kane ka foun dation ka la pynlong ruh ïa ki prokram bapher bapher kiba thmu ban kyntiew ha kaba ïadei bad ki rukom treikam kiba lah ban kyntiew ïa ka ïoh ka kot kaba neh na ka bynta ki nongrep, ki longkmie bad ki samla, kata kum ha ka kam ri blang, ka kam rep kam riang, thung dieng, soh bad kiwei pat.