Tang 6% ka pisa synniang nabar ri ka leit sha ki seng niam, kumba 94% ka leit sha ki NGO, ong u Sajay Jaiswal

Shillong, Naiwieng 02: U Chairman ka Joint Parliamentary Committee u Sanjay Jaiswal u la ong ba dei ban sngewthuh ïa ka jingshisha ba ka jingïoh jingïarap synniang na bar ri (foreign contribution) ka long tang 6 percent kaba leit sha ki seng niam ne Balang bad baroh kumba 94 percent ka leit sha ki seng treimon sngewbha ne sengbhalang (NGOs).
U la ong ba ka sorkar pdeng ka kwah ban thaw ka aiñ kaba myntoi lang na ka bynta kito kiba kwah ban leh ki kam kiba bha ha ka imlang sahlang hynrei ka aiñ kan lah ban long ka mawjynthut ïa kito kiba kwah ban leh ki kam kiba wanrah ki jingma ïa ka jingshong shngaiñ jong ka ri baroh kawei.
Ïa kane u la ong hadien ba la dep ka jingshong bishar kam ka Joint Parliamentary Committee (JPC) ïa ka Foreign Contribution (Regulation) Amendment Bill, 2026, kaba la wan poi ha Shilllong ban sngap ïa ki jingai jingmut bad ki jingsngewkhia jong ki seng niam, khamtam ki Balang Khristan, halor ka jingtyrwa pynkylla ïa ka Foreign Contribution (Regulation) Act, 2010.
Halor kane, u Chairman ka JPC Sanjay Jaiswal ula ïathuh ba ka Shillong ka dei ka jaka ba nyngkong eh shabar ka New Delhi kaba ka Committee ka la pynlong ïa ka jingïasyllok. Ula ong ba kane ka jingwan ka Committee ka dei kaba la leh halor ka jingkhot sngewbha u Myntri Rangbah Conrad K Sangma uba la kyrpad ïa ka Committee ban sngap nyngkong eh ïa ka jingsngewkhia ki nongïalam Niam ha ka Jylla.
U Jaiswal ula ong ba ka Committee ka la ïohpdiang bad sngap ïa ki jingai jingmut na ki seng bapher bapher ha Meghalaya halor ka jingtyrwa jong ka FCRA Amendment. Kila pan shuh shuh ïa ka jingpynshai na ki kynhun ba ïashimbynta, bad aipor ïa ki 15 sngi ba kin aiti ïa ki jubab.
U ïathuh ba hadien ka jingïoh pdiang ïa ki jubab, ka Committee kan sa pynkhreh ïa ki jingai jingmut hashuwa ban wanrah biang ïa ka Bill na ka bynta ka jingmynjur, da ka jingthmu ban pynthikna ba kane ka Aiñ kan shakri ïa ka bha ka miat jong baroh ki kynhun ba don bynta.
Palat 30 tylli ki kynhun kila ïashimbynta ha kane ka jingïasyllok ha Shilllong, kynthup ki nongmihkhmat na ki Jylla bapher bapher ka thaiñ Shatei Lam Mihngi.
Napdeng kiba mihkhmat ïa ki sengniam na Meghalaya ki dei u Fr Richard Majaw na ka bynta ka Balang Catholic, Rev Pastor HL Marshing (PCI) bad Dr DRL Nonglait na ka bynta ka Balang Presbyterian, Rev SK Syiemlieh na ka bynta ka Church of God bad Tony Marak na ka bynta ka Balang Baptist.