Ka jingïakhun jong ka NPP ha kane ka election ka long ban ïoh beit ka jingsynshar tang marwei: Dr. Kharlukhi

Shillong, Rymphang 15 : U state president ka National People’s Party (NPP), u Dr. Wanweiroy Kharlukhi u la ong ba ka NPP ha kane ka kynti kam kwah shuh ban don ïa ka Sorkar khleh khaw lang, bad ka jingïakhun jong ka party mynta ka long ban ïoh beit ka jingsynshar ba tang marwei.
U la ong ba ka jingïakren ban ïatreilang biang bad ki seng kiba don mynta ha ka Sorkar Meghalaya Democratic Alliance (MDA) ka party kam pat ïakren satia, hynrei kan sa peit hadien jong ka election.
Ha kaba ïadei bad ka jingkynthoh jong ka seng Congress ba ka Sorkar MDA ha ka jingïalam jong ka NPP kam shym la lah ban leh eiei ha ki san snem ba la dep, u nongïalam ka NPP u la ong, “Kane kadei ka por election, hynrei tang kawei kidei ban tip ba dei ki paidbah ki ban ai rai ha ka 2 tarik u Lber. Ngin ïapeit ha katei ka sngi, ka NPP kan jop bun ne ka Congress.”
Halor ka jingkynnoh bamsap ïa ka Sorkar ba ïalam da ka NPP, u la ong ba naduh kaba sdang u la dep ban pynpaw ba kadei tang ka jingpynthobria election.
“Nga la ju ong manla ka por, lada ki don ïa ki sakhi satar mano ba khang ïa ki ban leit sha Kashari, mano ba khang ïa ki ban phah tohkit,” la ong u Dr Kharlukhi.
Haba kylli halor ka jingdon bynta jong ka NPP hapoh ka North East Democratic Alliance (NEDA) ba ïalamda ka BJP, u nongïalam ka NPP u la ong, “Ngi dang dei ka bynta hapoh ka NEDA bad ngi dang don ruh bad ka Sorkar NDA, hynrei hadien ka election ngin sa ïapeit kumno ban ïaid.”