Shillong, Rymphang 15: U Bah Ardent Miller Basaïawmoit, President ka VPP u la ong ba ka jingphla ne pynpaw u Bah GK Ïangrai ìa ka jyrsieh ha ka tnad Pulit idei iba shi dana, hynrei kiba bun kim pat paw lut.
Haba ïakren bad ki nongthoh khubor hadien ba la pyllait ïa ka Vision Document jong ka VPP mynta ka sngi, u Bah Ardent u la ong ba kadei kane ka daw ba ma u ryngkat ki riewrangbah ki la seng ïa ka Party thymmai ban pynkhuid ìa kine ki jaboh kiba don ym tang ha ka tnad Pulit hynrei kiba don ruh ha ki tnad treikam bapher bapher jong ka sorkar.
“Wat mut ba ki Party kiba don mynta ha ka sorkar kin pynkhuid ïa kaei kaba la don lypa, hynrei dei tang ka VPP kaba lah ban leh ïa kane”, u la ong. Haba kyntait ban dawa ban leh ei ei halor kane ka jingphla u Bah Gabriel, u Bah Ardent u la ong ba ka jingdawa kam myntoi, namar ba lada kijuh ki Party ba synshar ha kine ki snem baladep ki wan biang ha ka bor namar kin nym leh ei ei.
“Namarkata ka daw ki paidbah kidei ban ailad ìa ka VPP ba kan sei madan bad pynkhuid lut ìa kane ka jyrsieh kaba don mynta ha ka Jylla. Halor ka jingma ìa ka jingim u Bah Gabriel kumba u phla, u President ka VPP u la ong ba ka don ka Ïingbishar ban peit bad kumba ka la ju peit tuklar ha kiba bun ki khep ha ka jingsynshar ka MDA, u ngeit ba u Bah Gabriel ruh un ïoh ïa ka jingbishar kaba hok.
