Ban thung kynhun tohkit halor ka bamsap ka sorkar kular ka BJP

Shillong, Rymphang 15: U National President ka Bharatiya Janata Party (BJP) u JP Nadda ha ka sngi Balang u la pyllait paidbah ïa ki jubanlak elekshon bad ka thong kaba ka party ka don na bynta ka jingkiew ka jylla.
Kane ka jubanlak elekshon kaba u JP Nadda u la pynlait paidbah halor ka phang pdeng ban aibor ïa ka jylla lyngba u Modi bad ka BJP.
Haba kren ha kane ka sngi u JP Nadda u la ongb ba ym ba kane ka juban lak kan dei tang ki kot pyndep rukom hynrei kan long ruh ka khlur maitlynti na bynta ka roi ka kiew ka jylla bad ka la dei lupa ka policy treikam jong ka sorkar na bynta ki san snem ban wan.
“Na ka liang jong ngi ngi sngewthuh shai ba ka jingsahdien ka jylla ka dei namar la satah palat ka bamsap na kata ka daw ngi kular skhem ban ngin leh shisha ruh ba tang shu wan ha ka bor ngin thung ïa ka kynhun tohkit ban khlieh da u Nongbisar ba la shongthait ka Supreme Court ban tih lut ïa baroh ki kam bamsap ha ka jylla,’ u la ong.
Ka BJP ka la kular ruh ba kan thung ïa ka Task Force ban tehlakam ïa ki kam tih bad khaïi dewiong tuh kaba wanrah ïa ka jingduh ka mariang bad ka jingdunong ka sorkar.
Na ka liang ka party ka la pynleit jingmut kyrpang na bynta ki kynthei ha kaba ka la kular ban sdang ïa ka skhim kaba yn tip kyrteng kum ka “Ka Phan Nonglait” ha kaba yn ai T 50,000 sha baroh kito kiba kha khun kynthei bad na ka liang ka sorkar kan kyrshan ei ïa ka jingpule naduh ka klas KG haduh ka kyrdan Post Graduation, yn aiei ïa ki scooty ïa ki samla kynthei kiba pas bha ha ki klas 12 kiba wan na ka ïing ka sem ba duna ka ïoh ka kot, yn mamng kyrpang ruh 33% ki kam ha ki tnad sorkar na ka bynta jong ki. Ka party ka la kular ruh ba kan pynkha ïa ka pyrton pulit jong ki kynthei kaba yn tip kum ka Phan Nonglait Battalion.
Ka BJP ka lular ruh ban sdang ïa ka Jugi Rani Jugi Silchi Support Scheme ha kaba yn kyrshan pisa da 24,000 tyngka na bynta ki kynthei ba ri khun swet.
Shuh shuh ka la kular ruh ban pyntreikam noh ïa ka 7th Pay commission na ka bynta ki nongtrei sorkar ha ka jylla bad kumjuh ban kyntiew da arshah ïa ka baibam tymmen na ka 500 sha ka 1000 tyngka.
Na ka liang ka BJP ka la kular ruh ba ka jingïakajia pud yn weng da ka jingïakren hapdeng ki ar jylla kaban wanrah jinghun lang na bynta ki paidbah ban shah ktah bad kumjuh ba yn buh ïa ki Police Outpost ba pura ha ki jaka khappud ka jylla bad ka Assam ban tehlakam ïa kino kino ki jingkulmar bad kumjuh ban wanrah ka jingshong shngaiñ ki paidbah ba shong ha khappud.
Haba ïadei bad ka koit ka khiah ka BJP ka la kular ban kyntiew sha 10 lak ïa ka skhim Ayushman Bharat ban kyrshan bai sumar ïa ki longïing baduk. Haba ïadei bad ka jaka pule doktor ka BJP ka la kular ba kan pyndep noh khang ban wanrah ïa ka jingmyntoi ki samla pule bad kumjuh kiba donkam jingsumar.
Shuh shuh u Nadda u ong ba ka party ka pynrung ïa ka mat ïohkam ki samla kum kawei na ki mat ba kan peit kyrpang ha kaba ka party kan thaw noh da ka Meghalaya Combined Recruitment Commission ban pynsted ïa ka jingthungkam ha ki tnad sorkar.
“Ngin pynmih ïa ka skill training bad na ka laing ka sorkar ngin pynkha thymmai kumba 3.5 lak ki kam da kaba kyrshan ïa ki samla ban ïeng ha la ki kjat lajong bad ngi pynmih ruh ïa ka Special Economic Zone, ki karkhan, kawei ka IT Park ba thymmai bad kiwei ki lad aikam ïa ki samla,” u la ong.
Shuh shuh u la ong ba ka party kan sdang ïa ka Karnesh Marak Youth Support Scheme ha kaba yn kyrshan pisa 1000 tyngka shibnai ïa ki samla kiba la pyndep ïa ka to graduate ba kin pykhreh ïa ki kyrdan pule ba kham shalor bad ban ïakhun ruh ïa ki eksamin wad kam.
Ka BJP ka kular ruh ban sdang ïa ka Silverine Swer Academic Excellence Scheme ha kaba ka sorkar kan aiei ïa ki smartphone ïa ki samla ba pyndep klas 12.
Haba ïadei bad ki nongrep ka BJP ka kular ban kyntiew ïa ka jingkyrshan pisa lyngba ka PM Kisan Samman Nidhi Scheme na ka 6,000 sha ka 8,000 tyngka shisnem bad kumjuh ban kyrshna da 3,000 tyngka shisnem lyngba ka Chief Minister’s Landless Farmer Scheme ïa ki nongrep kiba ym don jaka lajong.
Shuh shuh ka party ka kular ban sdang ïa ka Agri-Infrastructure Mission ha kaba yn mang haduh kumba 500 klur tyngka ban saiñ ïa ki mar rep bad kumjuh yn mang 250 klur na bynta ka White Revolution ban kyntiew ïa ka jingpynmih dud bad ban lah ruh ban pyndap ïa ka jingduna dud ha ka jylla.
“Kum ka party ngi kwah ruh ïa ka jingïakiew lang jong baroh ki jaidbynriew kiba don ha ka jylla na kata ka daw ngi kular ban sdang ïa ka Koch, Hajong bad Rabha Development Board na bynta ban kyntiew lang ïa kine ki jaidbynriew jong ka jylla,” kular ka BJP.
Ka BJP ka kular ruh ban aiei ïa u khaw, u kew, u dai na bynta ki paidbah kiba ju ïoh jingmyntoi lyngba ka Public Distribution Scheme.
“Ngin sdang ruh ïa ka Sanja Manda Sangma Canteens kaba yn die jingbam tang ha ka dor ba 5 tyngka shipliang ïa kaba ki jingbam ruh ki dei katkum ka rukom bam jong ki nongshong shnong ka jylla. Ngin sdang ruh ïa ka Tirot Sing Bhavan na bynta ki nongbylla ba kin ïoh jaka sah,” la ong Nadda.
Ka party ka kular ruh ban sdang ïa ka Meghalaya Road Maintenance and Upgradation programme na bynta ban pynheh pynbha ïa ki surok kat kum ka juk badka jingïaid ka por khnang ban lah ban weng ïa ka jingdheng kali.
Shuh shuh ka BJP ka kular ban thung ïa ka high-level committee kaba yn khlieh da u nongbishar ba la shongthait ka High Court ban tohkit halor ka bamsap bad kumjuh halor ka jingbym lah treikam ka Meghalaya Energy Corporation Limited (MeECL) khnang ban pynthika ba ka jingïoh bording kan dei ha baroh 24 kynta.
Haba ïadei bad ka ktien ka thylliej ka BJP ka kular ruh ban kyntiew ïa ka ktien Khasi bad Garo da kaba pynmih ki kot ki sla ban kyntiew ïa ka ktien bad ka thoh ka tar.
Na ka liang ka BJP ka klar ruh ban kyntiew ïa ka riti dustur da kaba yn sdang ïa ka state-of-the-art Tribal Museum ban buh tyngkai bad pyninam ïa ki riti ki dustur ka jylla bad kumjuhb ban sdang ïa ka Trival War Memorial kum ka dak ka jingai burom ïa u Pa Togan sangma, u Tirot Sing bad u Kiang Nangbah. Shuh shuh ka kular ban mang da 200 klur na bynta ban tyngkai bad pynbha ïa ki jaka mane blei, ki ïingmane ki law kyntang kiba don ha ka jylla.