Shillong, Rymphang 15: Ka Voice of the People Party (VPP) ha ka sngi Balang ka la pyllait paidbah ïa ki mat ïohi jngai (Vison Documents) kiba ka party ka don na ka bynta ka jylla ïa kaba la pynlait da u President ka seng u Bah Ardent M Basaiwamoit.
Ha kane ka thong ka VPP ka buh ki mat ban wanrah jingkylla ha ka ïoh ka kot jong ka jylla kan kiew rasong bad ban rat dyngkhong ba ïa ka jingduk bad ba ka jylla kan long kaba imsuk im shngaiñ ha la ki pud sawdong.
Ban sei ïa ki nongïalam kiba shemphang, kiba bakhlaiñ bad bashlur bad kumjuh ban wanrah ïa ka jingsuk ha ka longbriew manbriew bad ruh ban pynthikna ïa ka roi ka par ha baroh ki liang.
Ka VPP ka buhthong ruh ban wanrah ïa ka synshar kaba khuid bad ba don nongrim jong ka synshar paidbah ba khlem shah shiliang.
Shuh shuh ban pynthikna ba ïa ka jingdon jingem ha ka jylla yn bhah bynta mar ryngkat bad yn pyndonkam tyngkan na bynta ka jingmyntoi lang ki pateng ban dang wan.
Nalorkane ka VPP ka buhthong na bynta ban pynneh pynsah ïa ka riti dustur bat khyndew bat shyiap jong ki riewlum bad kumjuh ban wanrah ïa ka jingpynneh pynsah ïa ka mei mariang bad ban maramot ha ki jaka kiba la julor.
Shuh shuh ka buhthong ban pynlong ïa ka Meghalaya kum ka jylla ba biang eh ban wanrah ïa ka jingbei tyngka (investment) bad kumjuh ban kyntiew bad pynkup bor ïa ki samla ha ka pule puthi bad jinglong babha ba kin long kiba larkambad ruh ban kynhoh sha ka jingdon ka jingburom ïa ka long kynthei long shynrang bad ban ym don kano kano ka jingñiew shiliang khmat.
“Ka party ka ïohi jngai ba ka jylla Meghalaya kaba ju don ïa ka jingshah hikai, ki jingsneng jingkraw ba la ïoh na ki pa tymmen ka la sdang khie im biang ha ka liang ka akor burom, ka jingnang jinstad bad ka jinglong jingman ka ban sa long kum ka nongmuna ha baroh kawei ka Ri India,” ong ka thong ïohi jngai ka party.
