Thalaiñ ka Congress ïa ka AITC ba wanrah da ka saiñ pyrthei ïaumsnam na West Bengal ha Meghalaya
Shillong, Rymphang 15 : Ka Congress hynne ka sngi Balang, kala kynnoh ba ka All India Trinamool Congress (AITC) kala wanrah ïa ka saiñ pyrthei ne politik ïaumsnam” jong ka West Bengal ha Meghalaya.
Ka Nongaiktien ka AICC Supriya Shrinate haba ïakren bad ki nongthoh khubor kala ong ba ka TMC kala wanrah ïa ki kam ïaumsnam por elekshon jong ka West Bengal ha Meghalaya kaba la paw shai na ka jingïakulmar kaba jia ha West Garo Hills dang shen.
Ha ka 9 tarik Rymphang, ki Pulit ka Jylla kila kem haduh 16 ngut ki Nongkyrshan ka TMC namar ka jingkulmar ha Ri-lum Garo.
“Ka TMC kam pat don ha ka bor ha Meghalaya hynrei ki kam ïaumsnam kila bud ïa ka TMC kat shaba ka leit la ka dei ha West Bengal lane Tripura. Ka Meghalaya ka dei ka Jylla ba shongsuk” kala ong.
Haba kynnoh ba ka TMC ka dei ka party kaba kyrsum ha ki kam bamsap ban ïuhroit ïa kiba duk, ka Supriya kala ong “Palat T.100 klur la shim kum ka jingpynbam pisa (bribe) da ki Nongïalam ka TMC na ki nongshongshnong ha ka jyrsieh thungkam nonghikai. U Myntri barim ka Tnad Pule Puthi Partha Chatterjee ula shong ha along naduh u Naitung 2022 hadien ba u shah kem ha ka CBI. Ka Saradha Scam, ka Narada Scam, Rose Valley Chit Fund Scam bad dang shem sa ka jyrsieh khaïi masi kaba donkti da uwei pat u Nongïalam ka TMC u Anubrata Mamdal uba don mynta ha along”.
Haba pynpaw ba ka jingtheh pisa jong ka TMC ha kane ka elekshon Meghalaya ka dei ka bym lah pyrkhat shuh, kala ong “Nangno kane ka pisa ka wan? Ka jingantad jong phi kan long thik kum ka jingantad jong ngi”.
Ka ong ba ka jingwan kynsan jong ka TMC bad ka jingmih kyrieh hadien ka elekshon ha Goa ka pynartatien shibun ïa ka TMC.
“Hato ka TMC ka dei ka paralok ba sopsop jong ka BJP?. Hato ka jingrung ka TMC ha Goa ka dei tang ban pynpra ïa ki vote jongka Congress. Hato ka TMC ka thmu ban lehlang kumjuh ha Meghalaya?. Hato ka thmu ban shukor ïa ki paidbah ka Jylla Meghalaya ruh?. Lada kam don ka jingïateh bad ka BJP ha Meghalaya, balei ba ka TMC ka sngap jar halor ka BJP ha Meghalaya” ka la ong.