Jied ïa ki nongmihkhmat ki ban saiñdur ïa ka lawei ka ri bad ka jaidbynriew : Paul
Wat ai ba ka kabu ksiar kan kylla bamsyiar
Shillong, Rymphang 15 : U Working President ka UDP uba dei ruh u kyrtong ka Party na ka West Shillong Constituency u bah Paul Lyngdoh haba kren sha ki paidbah lyngba ki lad pathai khubor ula kyntu jur ïa ki paid nongthep vote ym tang jongka West Shillong Constituency hynrei ha ka jylla hi baroh kawei ban jied ïa ki nongmihkhmat kiba don ka bor bad iktiar ban saiñdur ïa ka lawei jongka ri bad ka Jaidbynriew kiba lah ban thaw ïaki aiñ ki kanun ki ban ïada ïa ka jaidbynriew.
U la ong “ Shim ïa kane ka kabu ksiar ban wanrah ka jingkylla bad wat ai ba kane ka kabu ksiar kan kylla bamsyiar namar lada hun ban shu long tang kum ki nongshah bret bam syiar bad tang shu puh ïa u khaw pyrsit la shah tap ha ki polo jong ki bad kin set baroh san snem hapoh kitei ki polo jongki”.
U la ong “ Nga kwah ban pynkynmaw ïa phi ba ka kam synshar khadar ka dei ka kam kaba kyntang bad ka kam kaba shongsbai shong Blei bad kumjuh ka jingkitkhlieh kaba khia ka long halor ki tyrpeng jongphi namar phin jied ym tang ïa u briew u ban mihkhmat ïa phi hynnrei phin jied ïa u birew u ban saiñdur ym tang ïa ka mynta hynrei khamtam ïa ka lawei ki khun ki pyrsa jong ngi. Ka jylla ka dang shu dep rakhe ïa ka jubili ksiar jongka ne ka jingdap sanphew snem kumta mynta nga tyrwa hakhmat jonpghi ïa ka kabu ksiar ba ngin wanrah ym tang ïa ka jingkylla ha ki durkhmat jong ki nongmihkhmat hynrei khamtam ka jingkylla ha ka rukom saiñdur bad thaw ïa ki aiñ ki kanun kiba ïadei bad ka jingbit jingbiang ka ri , ka jaidbynriew bad ka jylla hi baroh kawei”.
U la kyntu ïa ki paidbah ban kyndit bynriew noh ban ym shah set haki polo kum ki syiar san snem lynter. “ Kane ka dei kaei kaei kaba itieng ïa ka jylla jong ngi ka jylla kaba don shibun kiei kiei kiba dang hap ban pyndep bad kane kan sdang tang da ka jingpynkup bor bad iktiar ha ki briew kiba shongnia, shongkun ba kin shim ïa kata ka jingkitkhlieh. Kumta ka jingkyrpad jong nga ka long sngewbha ban ïamih paidbah ha ka 27 tarik bad kyrshan ïaka UDP ka seng trai ri trai jylla kaba heh tam bad kaba la rim bha kaba mih na ka dewmet jongkane ka jylla kaba la mih naduh ka seng APHLC bad ter ter” pynkut u bah Paul.