Jur shaba palat ka jingdheng kali ha surok NH-6 Narpuh, suhsat ka leit ka wan ki paidbah
Khliehriat, Nailar, 10: Ka jingdheng kali kaba jur bha surok National Highway-6 ha ka thaiñ Narpuh khamtam ha Kuliang, Sonapyrdi, Ratacherra, Malidor, East Jaiñtia Hills District ka la pynjynjar bad pynsuhsat haduh kata kata ïa ki paidbah nongleit nongwan bad ïa ki nongñiah kali namar ka jingsniew shaba palat jong ka surok
Wat ki kynhun treimon sngewbha na ka jylla Assam, ba kynthup ïa ka Barak Udayan, ka Awaz Foundation, ka Badarpur Develoment Parishad, Lion’s Club Badarpur bad kiwei kiwei dang ha ka 19 tarik, Jymmang 2024 ki la phah da ka jingthoh sha u Myntri ka Sorkar Pdeng u Nitin Gadkari uba peit ïa ka Ministry of Road Transport and Highways (MoRTH) ban pynpaw ba kiba leit ba wan na kane ka surok ki la ïakynduh jingeh namarba la sniew shaba palat ka surok naduh Lumshnong terter shaduh Malidor.
Ka jiingsniew jong kane ka surok ka la ktah ym tang ïa ki paidbah nongshong shnong jong ka thaiñ hynrei wat ïa kiba wan na ka jylla Mizoram, Tripura, Assam khamtam ruh ïa kiba na them Barak Valley kiba ju ïaid na kane ka surok. Ki kynhun na ka jylla Assam ki la pynpaw ruh ïa ka ka jingsngewkhia ba kum kane ka surok ka buh jingma ruh ïa ka jingim briew khamtam ïa kiba pang ba shitom kiba donkam ban kit sha ki jaka ai jingsumar.
U Mawphor ha ka jingjurip dang shen, u la lap ba ka surok NH-6 ha ka thaiñ Narpuh khamtam naduh Lumshnong ter ter shaduh Malidor ka la dap sa tang da ki thliew ki syar kiba heh bad ka jingsniew ka surok ka la nang kham jur shuh shuh mynta.
Ka jingsniew shaba palat jong ka surok ka la buh jingeh bad buh jingma shikatdei eh ïa ki kali heh kiba kit jingkit bad kumjuh ruh ki kali rit. Watla ki nongtrei jong ka National Highway Authority of India (NHAI) ki la pyrshang ban maramot hynrei ka jingmaramot ka long ka bym ihun satia bad dang bun bah ki thliew ki syar ba dap da ka um ktieh ha shilynter ka surok bad ka jingdheng kali ruh ka jur bha ha ka thaiñ. Ym tang kata, na ka daw ka jingsniew shaba palat ka surok, bun ki kali ruh ki la sniew bad hap ban ieng ha surok.
Ha ka jingïakren bad ki nongshong shnong jong ka thaiñ, ki la pynpaw ïa ka jingsngew khia halor kane ka jinglong jingman jong ka surok.
Nalor kata, na ka jingjur shaba palat u slap ha East Jaiñtia Hills District ka la wanrah ruh ïa ka jingtwa khyndew kaba jur ha ka surok NH-6 bad ka jingtwa khyndew ha ka thaiñ Kuliang bad Lumshnong ka la tap ruh wat ïa ki kali kiba ïaid lyngba na kane ka surok.