Shillong, Nailar 10: Ka khubor ba la ïoh na ki pulit la ïathuh ba u Ramprit Rai u la phah ka jingujor ba hapdeng ka mied jong ka 6 bad 7 tarik mynta u bnai, ki runar bym lah ban ithuh ki la prong hapoh ka Sri Aurobindo Institute of Indian Culture, kaba ha Bivar Road, Shillong bad ki la tuh ïa artylli ki TV set, kawei ka geyser, kawei ka water pump, bad ki tiar bording nalor kiwei pat ki tiar. Ha kawei pat ka jingjia ki pulit ki la ïathuh ba u Pradeep Negi jong ka 4th Bn., ki shipai BSF, Umpling, Shillong u la phah ka jingujor ba ha ka 30 tarik u Naiwieng, 2023, ha ka por ba pynshisha ïa ki syrnot jong u Sanjeev Kumar, Dheerendra Kumar, Ankit Kumar, Niranjan Kumar, Ajit Shakya, Archit Pal, Ambrish Kumar, Ajay Kumar Yadav, Ashish Singh Yadav bad u Pramod Kumar, kiba la shah jied na ka bynta ki kam BSF Constable (GD) lyngba ka SSC examination, 2022, la shem ba kitei ki briew ki la ai da ki syrnot kiba thok.
Shuh shuh ki pulit ki la ïathuh ba uwei u nongshong shnong uba sah ha Shillong u la phah ka jingujor ba ha ka 7 tarik mynta u bnai ha ka por 11 baje mynstep, u la shah phone lah bun sien ha kaba utei uba phone u la pyrshang ban thok ïa u shaphang ka jingïoh parcel, ha kaba u la ong ba katei ka parcel ka la don ha Custom Office. Halor kane utei uba la ujor u la kyntait ban kohnguh ïa katei ka jingpyrshang jong utei uba phone.
Ha kawei pat ka jingjia ki pulit ki la ïathuh ba kawei ka longkmie kaba na ka shnong kaba dang hab ha East Khasi Hills ka la phah ka jingujor ba ha ka 5 tarik mynta u bnai, ka la shah sei tuh ka pisa haduh 2 sien kaba la kot sha ka T. 29,400/- napoh ka Bank account jong ka, kaba la leh khlem ka jingtip jong ka.
Ki pulit ki la ïathuh ba ha kawei pat ka jingjia u Salseng S Marak u la phah ka jingujor ba ha ka step jong ka 6 tarik mynta u bnai, ka auto-rickshaw jong u kaba don nombar ML-08J-2314 ka la jah napoh Civil Hospital Tura (WGH).
Shuh shuh ha kawei pat ka jingjia u Ronithson M Marak bad u Nopson Marak kiba na ka shnong Magalpara kaba dang hab hapoh Dadenggre PS (WGH) ki la phah ka jingujor ba ha ka 1 tarik mynta u bnai ha ka por kumba 2 baje mynstep, la shem ba haduh 3 tylli ki masi ki la jah napoh ka sem masi kaba ha katei ka shnong.
