Da kawei ka bor yn ïakhun ki 10 tylli ki ADC na North East ban pynsawa ïa ka sur ha ka Sorkar Pdeng

Shillong, Nailar 10 : Ki shiphew tylli ki Autonomous District Council (ADC) na ka thain Shatei Lam-mihngi jong ka Ri ha ka sngi Saitjaiñ ki la shim da kawei ka rai ba kin tylli lang kawei ka bor kawei buit ban kyntu bad pynbor ïa ka sorkar pdeng ba kan pynsted ban pynbeit ïa ki jingeh jong ki District Council khamtam eh haba ïadei bad ka jingpynbeit thymmai ïa ka Khyrnit kaba Hynriew jong ka Riti Synshar jong ka Ri.
Ïa kane ka rai la shim ha ka jingïalang ba la pynïaid da Convener ka kynhun ba dei ruh u CEM ka KHADC, Bah Pynïaid Sing Syiem kaba long ha Tripura Castle, Shillong.
Haba kren sha ki lad pathai khubor, u Bah Pynïaid u la ong, “Na ka liang u Myntri Kampohiing ka Ri, u Amit Shah u la kular ha ka jingïakynduh jong ngi kaba long dang shen ha nongbah Delhi ba hapoh ka 25tarik Nailar, kata hapoh shibnai, la bthah ïa ka komiti kaba la thaw dang shen ban pyndep ïa ki kam baroh kiba ïadei ban weng ïa ka jingeh kiba la wanrah bad pynsngew da ki 10 District Council.
Shuh shuh u ong ruh ba ka jingïakren ha katei ka sngi ka long ban buddien ïa ki kam kiba ïadei bad ka jingïakynduh ïa u Myntri Kampohiing ha nongbah Delhi. “Kumta, ngi la rai ruh ban thaw da ka Komiti ban pyntikna ïa ka jingïatylli lang jong baroh 10 tylli ki District Council halor katei ka kam,” u la ong. U Bah Pynïaid u la ong ruh, “Kane ka Komiti kaba ngan khlieh kum u Chief Convener, kan ïalam ïa ka kynhun jong kine ki 10 tylli ki ADC na ka thain shatei lam-mihngi jong ka Ri ban buddien. Da kawei ka sur ngi la rai ban ïatylli bad ban kyntu ïa ka Sorkar Pdeng ba kan pynsted ïa kane ka kam.”
La ïathuh ruh ba nalor kine la jied ruh ïa u Chairman jong ka The Indigenous Progressive Regional Alliance (ba la tip ruh kum ka TIPRA Motha) u Pradyot Manikya Deb Barma bad u Elwin Teron jong ka Karbi Anglong Autonomous Council (KAAC) kum ki nongai jingmut ha ryngkat ki dkhot na baroh 10 tylli ki ADC.
U Bah Pynïaid u la ong ruh ba katkum ka jingong jong u Amit Shah, la kular ba hapoh shibnai yn sa pynbeit ïa ki jingdawa jong ki 10 tylli ki District Council ha shwa ban wanrah ïa ka jingpynkylla thymmai ha Parliament. U ong ruh ba ki khmih lynti ba ïa kane ka jingtyrwa ban pynbeit thymmai ïa ka Khyrnit ba Hynriew yn sa wanrah ha ka Dorbar Parliament kaban long ha ka Por Tlang.
Ha kajuh ka por u la ïathuh ba na ka liang ka Bodoland Territorial Council (BTC) ka la rai ban ai jaka sha baroh shiphew tylli ki ADC na ka bynta ban shna ïa la ki jong ki Guest House lane ki Ophis jong ki. Katba ka Tripura Tribal Areas Autonomous District Council ka la mynjur ban buh noh da ka skul ha ka ktien English kaban ai kyrteng ha ka kyrteng u Khlawait ka Jaidbynriew Khasi, u Tirot Singh ha North Tripura kaba bun ki nong shong shnong kik dei ki Khasi Pnar.