Shillong, Nailar 10: Ka All Assam Students’ Union (AASU) ka la maham tyngeh ïa ka Sorkar Pdeng ba kam dei ban pynlong ïa ka thaiñ Shatei Lam Mihngi kum kaba jaka theh ñiut ki nong Bangladesh ba rung beaiñ.
U Nongaibuit ba hakhlieh duh ka AASU Samujjal Bhattacharya ula ong, ” Ki paid riewlum ka thaiñ Shatei Lam Mihngi bad ka North East Students’ Organisation (NESO), ka sngewkhia bha halor ka jinglong jingman ka suk ka saiñ ha Bangladesh. Haba don kino kino ki jingjia ha Bangladesh, ka jingrung beaiñ ka don beit bad namar kane ki paid riewlum ka thaiñ ki ju shah ktah jur bha”.
“Naduh ka jingphiah ïa ka Ri ha u 1947, ka jingrung ki briew na East Pakistan ka la jia bad ha u snem 1971 haba ïoh laitluid ka Bangladesh, ngi la sakhi ïa ka jingrung beaiñ ki nong Bangladesh ha NE. Watla katta ka jingrung ka la jia beit ha NE bad kane ka la buh ka jingma ïa ki paid riewlum ka thaiñ. Ngi la ïohi ha Tripura ha kaba na ka 45 lak ngut ki briew, 15 lah ki dei ki riewlum trai jylla bad kine ki trai jyla kila kylla long ki ritpaid ha la ka jong ka jaka,” ong u Samujjal.
U la bynrap, “Ha Assam, wat ka jingïakhih ba sah khana ha Assam ha kaba haduh 60 ngut ki briew kila ïap bad hadien sa ka jingsoi ïa ka Assam Accord ka bym pat pyntreikam haduh mynta, ka jingrung ki nong Bangladesh ka dang ïai bteng beit ha Jylla. Ka Meghalaya bad Arunachal Pradesh ruh kila mad ïa kane ka juh ka jingeh. Kumta, ka don ka jingma ïa ka snap ba kyrpang ki riewlum ka thaiñ, ka jingma ïa ka ktien ka thylliej, ka kolshor bad baroh kiei kiei”.
Ul a ong, “Na ka bynta ki Seng jong ki samla pule ka NE, ngi la phah ïa ka dorkhas sha u Myntri Rangbah Duh ka Ri ba um dei ban ai jingïarap ne jaka rieh tngen ïa ki nong Bangladesh ha ki Jylla ka thaiñ Shatei Lam Mihngi namar ka thaiñ kam dei ka jaka bret ïa ki nong Bangladesh ba beaiñ”.
“Ngi dawa ba dei ban khangdam ïa ka khappud namar napdeng ki 7 tylli ki Jylla ka thaiñ, saw tylli ki dei kiba don jingma bha,” ong une u Nongaibuit ka AASU.
