Shillong, Nailar 10 : Ki nongshong shnong ka jylla khamtam na nongbah Shillong ha ka janmiet sngi Saitjaiñ ki la ïoh ïa ka lad ban sakhi ïa ki nongrwai kiba tbit tam na ka jylla ha ka Akashvani Music Concert kaba long ha Soso Tham Auditorium, Shillong kum shi bynta ban rakhe ïa ka jingïoh jinglaitluid jong ka Ri na ka jingsynshar ki Nongwei.
Ha kane ka Akashvani Music Concert ba la pynlong da ka Akashvani Shillong la wan ban pynshongshit da ki kynhun nongrwai ba kynsai kiba la pynhun jrut ïa ki nongpeitkai da ka jingrwai kiba sngewtynnad khamtam eh ki jingrwai ieid ri.
Ka samla Bateithymmai Nongrum ka la ai ruh ïa ka jingrwai Hindi ka ‘Ae Mere Watan Ke Logo’ ban ai burom ruh ïa kito kiba la aiti ïa la ka jingim na ka bynta la ka Ri.
Ki la don ruh shibun kiwei pat ki nongrwai kiba la pynsngewhun jrut ïa ki nongwan sngap kai kynthup ïa ka jingrwai na ka kynhun ba ïalam da i Balahpynhun Mawlong kumjuh na u samla Kitkupar Nongsiej.
La ïoh ruh ïa ka jingrwai na ka kynhun rwai Jaiñtia ba ïalam da i Kong Silbi Passah nangta ruh ka jingrwai Garo ba ïalam da u Gladborn Momin.
Ki paidbah ki la ïoh ruh ban ïarwai lang bad u nongrwai ba pawnam bha ha ki khyndiat snem mynshwa kiba haduh mynta mynne baroh ki nang lut ïa ka jingrwai jong u khamtam eh haba ïadei bad ka jingrwai Khwai Dohkha. Une u rangbah ba tip kyrteng kum u Bah Justine I Sunn u la ai kawei ka jingrwai ieid ri bad kawei ka jingrwai ban pynshongshit ïa ki paidbah kaba ïadei bad katei ka jingrwai leit khwai dohkha.
Kiwei pat ki nongrwai phareng ba pawnam kiba wan ban pynshongshit lang ha kane ka sngi ki kynthup ïa u Bah Donboklang Dohliing bad ruh ka samla Gwyneth Alicia Mawlong.
La donlang ruh ha kane ka sngi u Air Marshal S P Dharkar, PVSM, AVSM Air Officer Commanding in Chief, ka Eastern Air Command kum u Kongsan uba la ai ka jingïaroh ïa ka jingshakri jong ka All India Radio Shillong kaba la rakhe ïa kane ka sngi kyrpang ban kynmaw burom ïa ka jinglyngkhuh snem ka jingïoh laitluid ka ri bad kynmaw ruh ïa kito kiba la aiti ïa ka jingim na bynta la ka ri.
Ha kane ka Concert la don lang ruh u Additional Director General (A & BO) (CO – Akashvani) NEZ, Akashvani & Doordarshan u Ashish Bhatnagar bad kiwei kiwei ki heh katei ka tnad.
