Haduh 7-2 kol pynliem ka Meghalaya Police ïa ka Sanmer ha ka QF Third Divn

Shillong, Naiwieng 06 : Ka kynhun ïalehkai jong ka Meghalaaya Police ka la ïoh ban pynliem haduh 7-2 kol ïa ka Sanmer SC ha ka quarter final ba nyngkong jong ka lympung ïalehkai Third Division ba pynlong da ka Shillong Sports Association kaba long hynne ka sngi ha madan First Ground, Polo.
Ha ka jingïakhun, la ïohi ba ka MLP ka la ïoh ban kham tehlakam ïa ka jingïalehkai bad kane ka la plie lad ïa ka ban ïoh pynkhih jar naduh kaba 18 lyngba u Wesmanwell Marshillong ha ka kylla step. Watla ka MLP ka la ïoh bun ki kabu hynrei ka jingïakhun ha kane ka kylla ka la kut noh da 1-0 kol.
Dei ha ka kylla miet ba ka rukom ïalehkai kala khampher namar dei tang ha ka minit kaba 49 ba ka kynhun ka la ïoh ban thep ïa ka kol kaba ar lyngba u Wankhraw Nengnong pynbud pat sa u Ambrous Syngkli ha ka minit kaba 50 ïa ka kol kaba lai.
Ka MLP ka la ïoh ban thep kol ban ban bad dei ha ka minit kaba 7 ba ka la ïoh sa ïa ka kol kaba saw na u Aldin Ramsiej bad ïa ka kol kaba san na u Pynshailang Lyngkhoi.
Hadien ba ka MLP ka la ïoh ban lamkhmat haduh 5-0 kol, ka Sanmer kynsan kynsan ka la ïoh ban pynkhih jar lang ha ka minit kaba 62 na u Bryan Kharbudnah bad tang hadien 12 minit ei ei ka la ïoh biang sa ïa ka kol kaba ar na u Aaron Kharbudnah ha ka minit kaba 74.
Shipor, ka kynhun ïalehkai jong ka MLP ki la sdang ban kulmar namar khlem poi pyrkhat ki la shah pynphai haduh ar kol. Hynrei ka jinglah ban tehlakam ïa ka jingïalehkai ka la pynlong ïa katei ka kynhun ban ïoh pynphai biang sa ar kol ha ka minit kaba 80, kata sa shi kol na u Ambrous Syngkli bad ïa kawei ka kol pat na u Alfoster Sunn.
Da katei ka jingjop, ka Meghalaya Police ka la ïoh ban rung sha ka knockout da kaba ïoh lamkhmat ha ka Group A da ki 15 point na ki san tylli ki jingïakhun. Ha kawei pat ka liang ka Sanmer, kaba wan ba ar ha ka Group C ka la jop arsien bad ïakhaid kawei.
Ka jingïakhun mynta ka sngi pat kan long hapdeng ka PFR Academy pyrshah ïa ka Lawmali Pyllun SC ha ka por 2:00 baje mynsngi ha madan First Ground.

PFR Academy
vrs
Lawmali Pyllun SC
Por 2:00 baje
Madan First Ground.