Mih u Eugeneson Lyngdoh bad Aibor Khongjee ban ïalam ïa ka Rangdajied ha ka I-League 3rd Division
13tarik yn ïakhun ïa ka Millat ha Goa
Ki kyrteng jong ki nongìalehkai
Goalkeeper : Ialamlang Biam, Banshanskhem Kharsyntiew, December Khongjoh
Defender : Apborlang Kurbah, Arkwis Wanniang, Arlangky Nongsiej, Balamlynti Khongjee, Bankitbor Ryntathiang, Mebanaibok Kharbudnah, Ksankupar Khongmalai, Roland Shylla
Midfielder : Enester Malngiang, Dibormi Kassar, Bansanbha Khongsdam, Samuel Suting, Oresterwell Langshiang, Wansiewdor Nengnong, Jeff Malngiang, Benny Khriam, Knerktilang Buam, Dameki Khongstia, Bantiplang Khongjoh
Forward : Basuklang Bina, Roney Lamin Amdep, Damehun Syih, Wanlamsuk Nongkhlaw, Batiphar Swer, Stephanson Pale, Ieitlang Syiemlieh, Owanijuh Pajuh, Tremiki Lamurong, Aibanraplang Dohling, Blanang Khongsdam
Shillong, Naiwieng 06 : Arngut ki khlur ïalehkai barim ka India ba ka Meghalaya ka sei ha kine ki khyndiat snem, mynta ki la pynkhreh ban ïalam ïa ka Rangdajied United FC sha ka lympung ïalehkai 3rd Division I-League kaban sa sdang shen mynta u bnai.
Kine ki arngut ki kynthup ïa u Aiborlang Khongjee, u rangapdien ba la paw bha bad u Eugeneson Lyngdoh, u rangïalehkai pdeng madan. Dei ha ka por jong kine ki arngut ba ka phutbol ha Meghalaya ruh ka sdang ban kiew stet bha.
Ka Rangdajied hapoh ka jingïalam jong kine ki arngut, ha ka sngi Nyngkong ka la ïoh ban pyllait paidbah ruh ïa ka jersey kaba kin phong ha katei ka lympung, kata ha ka jingïakhun ha la ïing bad shabar na la ïing.
Na ka liang u Eugene kum u President haba kren bad ki lad pathai khubor u la ïathuh ruh ba ka jingïakhun ba nyngkong jong ka Rangdajied kan long pyrshah ïa ka Millat na Mumbai ha ka 13tarik mynta u bnai ha madan ïalehkai jong ka Dempo Academy, Goa.
“Ka thong jong kane ka klob ka long ba san snem, kata ba hapoh san snem ka long ba ngin rung biang ha ki lympung ïalehkai jong ka Ri. Kumta da ka jingtreiborbah naduh ki coach haduh ki nongïalehkai ngi la ïoh ïa ka jingjop ha ka Meghalaya State League bad katkum ka ain ba thymmai jong ka All India Football Federation (AIFF) ki lahduh ha ki lympung ïalehkai jong ka ri ki ïoh rung beit sha ka 3rd Division jong ka I-League,” ong u Eugene.
Da kaba ïathuh ba jan baroh ki nongïalehkai kidei kiba hapoh 21 snem, utei u rangïalehkai barim u la ong ruh ba kadei ka jingkitkhlieh jong ki kum ka kynhun ban peit ba ki nongïalehkai ba donsap kin ïoh ïa ka lad ban pyni ïa ka jingtbit jong ki khnang ba ha kawei ka sngi kin ïoh ban mihkhmat wat ïa ka Ri ruh.
Haba bynraplang, u Assistant Coach, Bah Aibanjop Shadap, u la ong ba ki nongïalehkai ka kynhun ki dei na jan baroh ki distrik jong ka rilum Khasi – Jaintia lait noh na rilum Garo.
Shwa kane, u Eugene u la pyntip ruh ba lada ki jop ha kane ka 3rd Division mynta ka samoi, kin ïoh pat ban kiew sha ka 2nd Division bad kumta ter ter. La pyntip ruh mynta ka samoi ki ïoh ïa ka jingkyrshan kaba radbah na sorkar jylla lyngba ka tnad Tourism bad ha kajuh ka por na ka kompeni Puma.
Ka kynhun kaba peit mynta ïa ka Rangdajied ka kynthup ruh ïa u Aibor Khongjee kum u Chief Technical Officer, Aibanjop Shadap kum u Assistant Coach, Wanlang Diengdoh kum u Manager bad Goalkeeper coach, Kong Golden Rymbai kum i Physio, Andrew Suting kum u General Manager kumjuhu Bah KS Kurbah kum u Chief Adviser nalor kiwei kiwei ki nongkitkam.