Katno ka long kaba sngewsynei ban pyrkhat shaphang kito kiba la ngat ha ka apot jongka jingkyrni ha ka jingdih drok ym tang ba ka ktah ïa ki shimet hynrei ïa ka ïing ka sem baroh kawei namar ka don ha ka jingim kaba dum. Ki drok kiba dei ki jingdih ba pynbuaid ki long ki atïar jingdum ba shyrkhei tam bad ki dei ki mar ba remdor bad lah ban ong dei tang kiba riew spah kiba lah ban ïalehkai bad ki. Ka long kaba shyrkhei ban ngop ha kine ki jingrïam kiba ym ju lah koit ban ïohi ïa ka jingsdang jong ki, hynrei dei tang haba kito kiba la kyrni kila poi ha u pud ba kim lah shuh ban rieh ba la lah ban ïohi paidbah ïa ki. Ki drok ki dei ki jingdih ne ki dawai kiba trei jai jai bad namar ba ki dei kiba remdor ki samla kiba duk kin ym lah satïa ban pyndonkam ïa ki lait noh ba ki shu ïoh ei na ki paralok kiba kloi ban pynlut pisa lem na ka bynta jongki. Ka long kaba sngew suhjer ban tip bad ïohi ba kine ki atïar jingdum ki la ïoh wat ban rung sha ki dong jong ka nongbah Shillong kum sha Mawlai kaba dei ka shnong ba shong ba sah tang para Khasi.
Ki don shibun ki daw ba ïalam ïa ki samla sha ka jingkyrni dih drok, kawei na daw kaba hakhmat eh ka dei ka jingsynjor jong ka longïing longsem. Ka jingpbymplie ka rukom pyrkhat ha ki kmie ki kpa ban pyrkhing ïa la ki khun ha kaba pyndonkam ïa ka pisa. Ka jingai pisa puk puk ïa ki khun bad pynbïang katba ki ang ka pynjot ym tang ïa ki khun jong ki shimet, hynrei ïa ki khun jong kiwei ruh bad ruh ka wanrah ka jingjah burom bad ka jingjynjar ïa ka ïing hi baroh kawei. Ym lah ban len ïa ka jingriewspah jong ka imlang sahlang mynta ha kine ki sngi bad dei na ka jingbun palat ka jingkamai ne ka jingïoh pisa ba ki briew ha kine ki sngi kim don por shuh hynrei baroh ki bunkam beit ban kamai. Dei na kane ka daw ba baroh baroh ki ong ba ka por ka la lyngkot bad imat kam don shuh 24 kynta ha ka shi sngi. Toi ki kynta bad ki second km shym la pat kylla ki long beit kumjuh.
Uwei u Rangbah u la ong ba ka daw kaba kongsan bad kaba hakhmat eh jong ka jingïoh lad jong ki samla ka dei na ka daw ka jingkyllei palat ka kamai shukor ne black money ba ki kmie ki kpa ki ai beit puk puk ïa ki khun katba ki ang. Ka jingïohlut jong ki khun ïa baroh ki jingkwah ha ka por ba ki dang rit dang lung ka rta ka pynlong ïa ki ban hïar dor noh ha ka longbriew man briew bad kiew dor ki kam sngewbha. Ka jingsngewbha ne ka enjoyment kam lah satïa ban pynhun ïa ki briew la ha kano kan ka kyrdan, dei na kata ka daw ba ki ïit ïa kiwei pat ki jingsngewbha kiba kham khlain kham khlain bor bad u drok u dei u wei na ki atïar ba khlain bor tam bad shisien ba la ngat la long kumba thep ïa along da lade ïalade. Ha kaba kut lada kim ïoh ïa u drok ki samla kim salïa ban leh ïa kano kano ka kam ruh bad kin ïaleh katlah katïai ban pynngop lem ïa kiwei khnang ba kin long ki nongkyrshan jong ki.Ki nongdih drok kim lah ban shu long nongthied sah, hynrei kin ïit ïa ki lad ki lynti kumno ban ïoh ban die de ïa ki khnang ba kin lah ban kyrshan ïa ka jinglut ba shyrkhei.
Dei na katei ka daw ba la lah ban ïohi ba ki pulit ryngkat ka jingïatreilang jong ki Dorbar Shnong ki la ïoh ban kem ïa ki samla kiba pyrshang ban pynïaid iew ïa ki drok hapoh ka shnong. Baroh shi katto la ju bna ba kum kine ki kam ki jïa ha ki shnong kiba ïashongkhleh bad kiwei pat ki jaidbynriew, hynrei mynta kane ka kam ka la rung wat ha ki shnong ba ïashong tang para khasi ruh. Ka long kaba shyrkhei ba kumno kitei ki samla ba die drok ki la pyrshang ban pynngngop ïa ki khynnah skul kiba dang lung dang rit ka rta.
Ka long kaba donkam ïa ki longïing longsem ban long kiba husïar bad kum ki kmie ki kpa donkam ban peitngor bha ïa la ki khun ki kti. Uwei u rangbah u la ong ba ki kpa khamtam lei, kiba dei ki nongkamai ka ïing kim dei ban pyni kop ne sop hakhmat ki khun ba haduh katno ki kamai namar ba kane ruh ka ïalam bakla ïa ki khun ki kti bad ka jingsngew riew spah jong ki ka wanrah ïa ka jingsngew sarong. Katno ka long kaba sngewlyngngoh ba ki don ki longïing kiba ki kmie ki kpa ki la hap ban bsa ïa ki jingdonkam drok jong ki khun jong ki tang na ka daw ba kim lah ban peit ïa ki jingktah jong ka jingkyrni dih drok jong ki. Haduh kumba 2000/- tam shi sngi ki don ki kmie ki kpa kiba shlan ban ïarap kyrshan pisa ban pynïoh ïa ki drok na ka bynta ki khun jong ki. Hynrei ha kaba kut kim shan bad ki hap ban leit ïalam noh ïa ki khun sha ki jaka aijingsumar.
Ki Dorbar Shnong ki donkam ban peitngor shisha bad shim khïa halor kane ka phang kaba lah ban ktah jur ïa ka imlang shlang. Ki bor pulit barabor ki long kiba ïatreilang bad ki paidbah ha kiba bun ki khep ba kum kitei. Ka sorkar ka donkam ban shimkhïa ban wanrah ïa ki lad jingpynsngewthuh paidbah kiba kham khlain halor katei ka phang khnang ba ki longïing kin long kiba phikir bad kiba peitngor.
