Rah ka Lady Keane ïa ka nam lahduh ha ka Inter College Women’s Football, NEHU

Shillong, Naiwieng 06 : Ka Lady Keane College ka la pynliem ïa ka Sngap Syiem College, Mawkyrwat da 3-1 kol ha ka penalty na ka bynta ban ïoh rah ïa ka nam lahduh jong ka Inter College Women’s Football Tournament ba la pynlong da ka skulbah North Eastern Hill University ha kane ka sngi Saitjaiñ.
Ha kane ka lympung ïalehkai kaba long ha SAI Centre, NEHU la sdang naduh ka 30tarik Risaw bad ki la don haduh khyndai tylli ki kynhun kiba wan ban shim bynta.
Khyndiat haba phai sha ka jingïakhun baroh arliang mamla kim shym lah satia ban thep kol ha ka jingïakhun hapdeng madan bad dei na kane ka daw ïa ka rai jop rai rem la hap ban shim noh da ka jingïashut tie-breaker.
Haba phai sha ka lynti ïaid jong ka Lady Keane shwa ba kan poi sha ka final, kane ka kynhun ka la ïoh ban pynliem shwa ïa ka Nongstoin College da 2-1 kol ha ka sngi sdang, ïakhaid bad ka St. Anthony’s ha kaba ar, pynliem ïa ka NEHU ha ka jingïakhun kaba lai. Hynrei ha ka jingïakhun semi final ka la jop da ka said kata da ka tie-breaker ïa ka Shillong College hadien ba ka jingïakhun ka la kut noh da mar 1-1 kol.
Ka Sngap Syiem ha kawei pat ka liang, ka la jop ha baroh saw tylli ki jingïakhun da kaba jop da 1-0 kol ïa ka Shillong College, nangta haduh 5-0 kol ïa ka Nabon Synod College ha shwa ba kan pynbud biang da ka jingjop 1-0 kol ïa ka St. Edmund’s College. Katba ha ka semi final pat ka la jop da Nongstoiñ College da 1-0 kol.
Ha kane ka sngi la donlang ruh u Prof K Deberma, Dean School of Social Science, NEHU kum u Kongsan uba la sam ruh ïa ki khusnam sha ki nongjop. La donlang ruh u N Das, Assistant Director ka PE & Sports nalor kiwei kiwei.