Mawkyrwat, Naiwieng 01: Ka Hynñiewtrep Youths’ Council (HYC), Mawkyrwat Circle, ha ka sngi saitjaiñ jong ka taïew ka 31/10/2026 ka la pynlong ïa ka Charity Football Match – cum – Awareness Programme halor ka phang pdeng, “Say No to Drugs” (Ong Em ïa U Drok) ha madan MDSA, Nonglang, South West Khasi Hills District, Mawkyrwat.
La pynlong ïa kane ka prokram da ka jingthmu ban pynsngewthuh paidbah halor ka jingma kaba mih na ka jingpyndonkam ïa u drok bad kiwei ki jait jingdih pynbuaid, khamtam hapdeng ki samla.
Kane ka prokram ka long ruh kum ka lad ban kyntu ïa ki paidbah ban kiar na ki jingmlien kiba sniew bad ban jied ïa ka lynti jong ka jingim kaba koit ba khiah bad kaba bha.
Ymtang kata, la pynlong ruh ïa kane da ka jingthmu ban kyrshan lem ïa kito ki samla kiba don shisha ïa ka mynsiem jong ka jingthrang ban kylla na kaba sniew sha kaba bha. Kawei pat ka long ban pynsngewthuh ïa ka jingïatylli hapdeng ki bor district, ki bor Balang, ki sengbhalang bad ki paidbah nongshong kumba ban ïaleh pyrshah ïa une u jingdih uba sniew uba pynjot ïa ka jingim briew shimet, ka ïing ka sem, ka Balang, ka shnong ka thaw bad ka imlang ka sahlang baroh kawei.
Ha kane ka lympung ïalehkai kynjatbol, ki don saw tylli ki kynhun kiba la wan ban ïashim bynta, kata ka Police Department Football Team, Nongsharai Shilliang Um Football Team, Nongsharai Mawkyrwat Area Football Team bad Shiparalok Football Team.
Ha ka jingïalehkai Semi-Final kaba nyngkong, ka Police Department Football Team ka la pynliem ïa ki Nongsharai Shilliang Um Football Team da 2–1 kol.
Katba ha ka jingïalehkai Semi-Final kaba ar, ki Nongsharai Mawkyrwat Area Football Team ka la jop ïa ka Shiparalok Football Team da 5–4 kol lyngba ka Tie-Breaker.
Ha ka jingïakhun Final, ka Police Department Football Team ka la long ka lahduh jong kane ka lympung ïalehkai hadien ba ka la pynliem ïa ki Nongsharai Mawkyrwat Area Football Team da 3–1 kol lyngba ka Tie-Breaker.
Nalor ka jingïalehkai kynjatbol, la pynlong ruh ïa ka jingïakop tan tyllai (Tug of War) hapdeng ka Women Police Mawkyrwat bad ka Chirynjup Village Organisation, Mawlangwir, ha kaba ka Women Police Mawkyrwat ka la khur ïa ka jingjop da 2–1 point.
Ha kane ka sngi, la donlang kum ki kongsan u Bah Renikton Lyngdoh Tongkhar, MLA ka Mawkyrwat Constituency, bad u Bah Pius Marweiñ, MLA/MDC ka Ranikor Constituency.
La sakhi lang ruh ïa kane ka prokram da ka jingdonlang u Bah B. Kharjana, Additional Superintendent of Police, South West Khasi Hills District, u Bah Robert Kharjahrin, u Bah Rickle Marngar, u bah R.R. Lyngkhoi, Myntri Shnong Mawkyrwat, ki nongkitkam jong ka MDSA, ki nongïalam jong ki sengbhalang bapher bapher ba kynthup ïa ka SSSS, HNYF, HANM, HITO, HYC bad KSU, ryngkat bad kiwei kiwei ki riew paidbah.
