Ka sorkar ka khlem pyntrei be aiñ ha kaba ïadei bad ka Shillong Ropeway Project: Dy. CM

Shillong, Risaw 29: U Bah Sniawbhalang Dhar uba dei u Symbud Myntri Rangbah ba khmih ïa ka tnad Transport ha ka sngi Palei ula iathuh ba ka Sorkar ka khlem trei beaiñ bad ka dang shong bishar ïa ki kynrum kynram kiba mih halor ka Shillong Ropeway Project.
Haba kren sha ki lad pathai khubor hadien ba la wai ka jingialang jong ka State Level workshop ba shi sngi ha Vivanta u la pynpaw ïa ka jingkyrmen ba yn sa lah ban pynbeit noh ha ki khyndiat taiew ban wan.
“Ka kynrum kynram kala mih bad ngi na ka Sorkar ngi la shong bishar ïa ka kam.Ngi kyrmen ba kane kan sa beit noh ha kine ki khyndiat sngi, khyndiat taiew ban wan.Ka project ka long kat kum ka ain, ngi la ioh ïa baroh ki jingbit na ki tnad kiba dei khmih” ong u Bah Sniawbha.
Ula ong ba kum kine ki kynrum kynram ki dei kiba shipor bad kan shim ïa ka por ba pynsngewthuh ïa ki paidbah.
Shuh shuh u la ong, “Kum kine ki kam ki ju mih bad leit, wat khuslai yn sa pynbeit ïa ki.Hateng hateng ki lah ban shim ïa ka por ban pynsngewthuh ïa ki paidbah namar ka dei ka project kaba heh”.
U Bah Sniawbha ula pynpaw ruh ba ka Sorkar bad ka District Council kin hap ban ïatreilang.