Bthah ka DGP ïa ki paidbah kiba donkam ki jingïarap na ki pulit
Khniot 112 ne dial ha u nombar 112
Shillong, Risaw 29: Ka ophis jong ka Director General of Police, Meghalaya ka la kyntu ïa ki paidbah ba kin pyndonkam ïa u Dial 112 kum u common Emergency Helpline Number na ka bynta ki jingïarap na ki pulit, ki kam pynlip ding, ki jingjia ba ïadei bad ka jingshah lyngshop bad kiwei kiwei ki lad jingïarap kyrkieh hapoh ka Emergency Response Support System (ERSS).
Ha ka jingpyntip, ka ophis ka la pynpaw ba ki pulit control room number 2226101 bad 2222217, ryngkat bad ki fire service number 101, 2227000 bad 2520400 la ju pynmih man ka por ha ki kotkhubor hapoh ka kyrdan “Important Telephone”.
Ban kyntiew ïa ka jingpynsngewthuh paidbah bad ban pynshlur ban pyndonkam ïa u nombar ba ïatylli, ka ophis ka la kyrpad ban pynmih ïa u Dial 112 ha ka jaka jong ki nombar pynlip ding kiba la don lypa 101, 2227000 bad 2520400.
Kane ka jingsdang ka thmu ban pynithuh ïa ki paidbah ïa ka lane jingïarap kyrkieh ba la pynïasoh lang bad ban pynsuk ïa ka jingïoh jingïarap kyrkieh lyngba uwei u nombar.