Shillong, Naiwieng 06: Ka Revolution MMA Gym ha ryngkat ka jingïatreilang bad ka Kinetic Urban Gym kaba don ha Jingkieng Nongthymmai Indoor Hall ki la ïasnohkti lang ban pynlong ïa ka rynsan ïakhun MMA ha kane ka sngi saitjaiñ.
Ïa kane ka lympung rynsan ïakhun MMA kaba la ai kyrteng da ka “Ai-reng Kickboxing Fight League Season-1 North East Competition 2023” la lamkhmat da u Head Coach jong kane ka Gym kaba don ha Lumsohphoh-Fire Brigade, u Bah Sam Lyngdoh.
Kane ka dei ka sien ba nyngkong ïa katei ka kynhun ban pynlong ïa kane ka rynsan ïakhun MMA, ïa kaba la pynlong ha Asom Kristi Hall ha Dhankheti.
Watla ka dei ka sien ba nyngkong ba la pynlong, hynrei la sakhi ïa ka jingwanshim bynta haduh 150 ngut ki rang bad ki thei kynthup ruh ïa kiba dang rit ka rta kiba donsap ha ka ïakhun MMA kiba wan na kylleng ki bynta jong ka thaiñ shatei lam-mihngi jongka ri kiba don la ka jong ka MMA CLUB bapher bapher.
Ha Kane ka sngi u samla Eric Nongkynrih KSU Sports Secretary jong ka Seng Kmie u la wan kum u Kongsan bad u samla Pynkmen Sanmiet-Education Secretary Sang kmie KSU kum u symbud kongsan lem bad kiwei.
