Shillong, Naiwieng 06 : Ka Mylliem Lum Sports Assocïation ha ka sngi Saitjaiñ ka la plie pyrda ïa ka 11th Mylliem Lum Football League 2023-24 ha Madan Umlympung 12mer ha ka ba u MLA ka Sohra Bah Gavin Mylliem u la long u Kongsan ryngkat ka jingïadon lang ki Rangbah Shnong bad ki Nongïalam ka MLSA kynthup ïa u Bah Koles L Marbaniang, President bad kiwei kiwei.
Ka jingïalehkai sdang ha katei ka sngi ka la long ha pdeng ka Mawpynthih pyrshah ïa ka Umlympung 12Mer bad ka jingïakhun ka la kut noh da ka jingïakhaid bad sam mar shi point.
Hakatei ka juh ka sngi la pynlong ruh ïa ka Final 1st Open to All Football Tournament ba lah pynïaid da ka MLSA ha kaba ka jingïakhun ka la long hapdeng ka Lumshyiap SC pyrshah ïa ka Shiparalok FC ha kaba ka Shiparalok FC ka la jop lyngba ka tie-breaker bad rah ïa ka song pisa ba hynniewphew hajar ryngkat ka Trophy bad ka Lumshyiap SC kaba wan ba ar ka ïoh rah ïa ka song pisa ba laiphew hajar tyngka ryngkat ka Trophy.
