Ka jingjop ne ka jinglah ban treikam ne shakri ha kano kano ka seng ne ka kynhun, ka klob(club) ne ka Association etc. ka shong eh ha ka kti bad ka jingtbit ne jinglah ne ka mynsiem ba shynrang jong ki nongïalam. Lada ïoh ïa ki nongïalam kiba shlur, kiba skhem jingmut bad ba don nongrim, khlem artatien kata ka seng ne kynhun kan jop beit ha kaba kut ïa ka thong (aims and objectives) jongka. Hynrei, lada ki nongïalam kilong kiba tlot (weak) ka jingmut jingpyrkhat, kiba kwah bad khwan jingmyntoi(selfish), kiba ïeng ruh khlem nongrim (spineless), kata ka seng ne kynhun kalong ka jinglehraiñ bad ka jingshah rkhie beiñ hakhmat ka pyrthei (paidbah ba bun) solonsar.
Shwa ka MLA elekshon 2023, baroh baroh ngi ïohi ba bun ki MLA ki ïa leh ieit ri ieit jaitbynriew lut. Baroh ki pyni shisha ba ki da ïeng ha ka nongrim kaba skhem (strong principles). Ki nang ruh ban leh mynleh bym ieit ne kwah spah ban shakri hok met bad mynsiem (sacrifice) na ka bynta ka ri bad ka jaitbynriew. Kim treh satia wat lada ki tyrwa san klur tang ban ïaleh (contest) na ka party ba tyrwa. Ki paidbah ki la ai jingïaroh bad thap kti thap kjat lut baroh. Phewse, ynda ki la jop bad long MLA, ha kata ka juh hi ka party ki leit nguh ki leit dem ban long syndon u dkhot jong kata ka party. Mynta, ka mih ka jingkylli na kiba bun ki paidbah, ba tang ban long candidate na kata ka party, ka shongdor san klur tyngka, lada leit pyndem syndon ynda la jop ne long MLA, tharai, katno ka shongdor? Don ki paidbah ki ong ba ka kham duna dor ynda la jop, hynrei bun pat hi ki ong ba ynda la jop lei lei, ka dor ka long shiphew ne arphew shah ïa ka dor shwa ban jop elekshon. Haduh katno kata ka dei ka lait, ki paidbah ki sah mynta ha ka umdum.
Ha shwa ka MLA elekshon,kine ki jait briew ki ong hana,ba kidei ki nongieit ri. Ynda la dep ka elekshon pat ki kylla ki nongdie ri. Mynshwa kidei ki nongïalam, mynta pat ki kylla nonglilam ïa ka ri bad ka jaitbynriew. Shisien ba la ngat ki nongïalam ha ka jingriam, sngew synei bad sangsot ïa ki paidbah ba shisur shidur kiba pli. Lada ki babe ruh ym myntoi shuh. Kiba kwah bad wad jingmyntoi te, ki ïa shong shit hi puk la kumba ïoh skei ki nongbeh mrad. Ban batai ïa ka nusip jong ka lashai te, ka eh bha. Shano kine ki nongïalam kin poi lada jia ba kylla syndet biang ka saiñ hima sima. Mano shuh ban shaniah ïa uba shet kylla tdong tdong khlieh khlieh.
Shisien ba la phai dien, la eh ban phai biang sha dien trai. Mei pap ka bneng ka khyndew ïa u bym sngewnguh. Uba rkhie, la la dei ban ïam, uba shngaiñ, la la sah marwei. Lada dei haduh ban da mih snam, ha uta kin shaniah kiwei.
