Wer paidbah ka VPP ban leit ai dorkhas ha u CM halor ka Reservation Policy bad Roster

Shillong, Jymmang 08: Ka Voice of the People Party (VPP) ha ka sngi Nyngkong ka la pynbna ba kan sa leit ban ïa kynduh ïa u Myntri Rangbah ka jylla ban buddien biang ïa ka jingdawa ka party ban pynkylla thymmai ïa ka Reservation Policy bad ban pynsahngeh shuwa ban thep kam ha ki tnat bapher bapher katba ym pat lah ban pynbeit ïa ka polisi bhah kam, bad na ka liang ka VPP ka la wer ïa ki paidbah ban wan synran lang ïa ki nongïalam ka par ha katei ka sngi.
Haba kren sha ki lad pathai khubor u Nongaiktien ka VPP u Dr Batskhem Myrboh u la ong ba kane ka jingleit ai jingthoh kaVPP ka long kum ka jingbud dien biang ïa ka jingthoh kaba ki la dep ban aiti ha u Myntri Rangbah ka jylla ha ka 6 tarik Ïaiong 2023.
“Ha ka 12 tarik mynta u bnai ha ka por 2 baje noh sngi ngin sa leit ban ïakynduh ïa u Myntri Rangbah ka jylla ïa kaban ïalam da u Bah Ardent M Basaïawmoit bad kiwei de ki MLA ka party bad ngi khot ngi wer ïa ki paidbah ka jylla ban wan synran lang ïa ngi sha kane ka jingleit ai jingthoh ka party sha ka sorkar na bynta ban dawa ïa ka hok ki samla,” ong u Dr Batskhem.
“Ka jingdawa jong ngi ban pynbeit ïa ka Reservation Policy ka long na bynta ka jigmyntoi jong ka jylla bad khamtam eh ki khun samla wadkam wad jam, bad ngi dawa ba dei ban pynshangeh shuwa ban pynlong ïa ki interview thep kam kat kum ka Roster System katba ym pat lah ban pynbeit ïa ka Reservation Policy,” u la bynrap,
U Dr Batskhem u la ong ruh ba ka party ka kyntu ïa ki paidbah kiban wn shim bynta ban bat ïa ki kyndon ha ryngkat ka burom ka akor ym ban thaw ïa kino kino ki jingkulmar, ‘namar ngim kwah ban wanrah jingkulmar hynrei ban ai ïa ki samla ïa ka lawei ba shngaiñ,’ ong u Dr Batskhem.
Haba kylli la ka VPP ka pdiang ne em ban shim bynta ha ka All Party Meeting ba ka sorkar ka kular ban khot, “Na ka liang ka party ka pdiang ïa kino kino ki sienjam kiba ka sorkar ka shim ha kaba ïadei ban pynbeit thymmai ïa ka Reservation policy hynrei namar ba ba kane ka jingkam ka sorkar ban khot ïa ka All Party Meeting ka dei beit tang ha ki lad pathai khubor ka party kam pat kwah ban ong eiei,” jubab u Dr Batskhem.
Haba kylli la ka VPP ha ka jingïakynduh kan buh por ne em ïa ka sorkar u Dr Batskhem u la ïathuh ba ka party kan pyrkhat ïa ki sienjam kiba dei eh la ban buh por ne em ‘hynrei ka jingthmu hi ka dei beit ban pynbor ïa ka jingdawa jong ngi naduh kaba sdang wat lada ngi ïohi ba u Myntri Rangbah ka jylla haba jubab ïa ka mat ba la rah da u MLA ka party u Bah Ardent ha kaba ïadei bad ka Reservation Policy um don mon wat la katta ryngkat u paidbah ngin pynbor ba ki hap ban sngap ïa ka sur u paidbah,” u la ong.