Hadien ka jingkhlad noh i Dr.Ricky J Synkon, i MP na Shillong Lok Sabha Constituency, iba ki paidbah ki da ieit bad burom bha shisha ïa I bad kum u nongïalam uba don shisha ka jingkyrmen ïa ka ri bad ka jaitbynriew Khasi-Jaiñtia jong ngi, mynta pat, ka la mih ka sur wur wur- wer wer shane shatai ba ka Party VPP ne party Prah ba ki ju khot, ka la sdang hiar noh arsut ka lyer (waves) jong ka wat hapdeng ka bye-elekshon MP ka ban sa long shen ha kine ki khyndiat bnai kiban sa wan. Ha ka jingshisha, kane ka samoi treikam u MP na Shillong seat (mid term poll) ka dang dei ka pali (turn) jong ka VPP lada dei ba dang im i Dr (L) Ricky J Synkon. Ka jinghiar ka lyer VPP mynta ka sien, ki ong, ym dei eh ba kim trei shitom ki nongïalam ka party, lymne ba ki ju pynap borti ne phriang jaiñ tap moh manla ki jingïalang paidbah ban ïoh bai kynshew na ki paidbah ba wan meeting ha man la ki meeting ba ju ki ju leit pynlong, hynrei ka dei khamtam eh ha ka liang ka akor ka burom bad ba kim lah satia ban tehlakam ne synshar (control) ïa ka ktien ka thylliej ba ki nongïalam nongpynphriang khubor paidbah jong ka (youtuber), ki ju kren man ka teng sha ki paidbah nongpeit bad nongsngap lyngba ki lad pathai khubor paidbah (social media).
Kumno ka party kaba la bun ki nonghikai ba tbit, ki riew donburom suda, kaba ju ïalap ruh (preached) ban pynkylla dur ïa ka rukom im ki briew ka Ri Khasi -Jaiñtia kim lah satia ban tehlakam ïa ki nongïalam ba hakhmat jongka ban shu phah tim sih- tim sang, ban shu tla shu tlep da ki ‘tien sih ‘tien sang kiba, ha kiba sngap, (sngewbha map ïa nga), sngew kumba khlem phong sopti khlem phong patlun shuh. Ban plie channel ha kamra Tv khamtam haba ïadonlang ki khun ki kti, kiba ha ïing ha sem ne haba don lang ki khynnah skul ne samla pule la sngew lehraiñ bad jah burom hi khait ïa ka rukom kren jong ki nongïalam jong kane ka party ba ki la pynphriang (spread/interpret) lyngba ki youtube ne social media jongki.
Ngi ju sneng barabor ha ïing ha sem, ha lynti ha syngkien haduh ha ki jaka pule ba, ban pyndonkam ïa ki ktien sniew ktien smeh, horkit hordang ka long kaba sang ban pyndonkam. Ban pynshlur (encouraged) bad ai mynsiem ïa ki ktien sniew khamtam ha ki lad khubor ba ïa sngap paidbah kam long satia kaba dei. Ha ka jingshisha, “La duk- la suk, la rit la ria khampher, dei ban ri ban sumar bad bat kyndong ïa la ka burom”.
Ka Burom kaba tam ha kane ka pyrthei. Lada bakla ka burom ka akor, ka ktien ka thylliej, kata la kylla ‘riewkai ei kha-ma-kha. Lada phi nang phi stad katno katno ruh, lada phi don ka spah shi pyrthei ruh ne phi nang ban kren ki ktien kiba thiang kum ka um ngap (good lip service), hynrei lada phim don ka akor ka burom, phim nang ban tehlakam ïa la u thylliej, kam don jingmyntoi ei ei bad long lehnoh ei lut kita baroh. Ha ki por ba long nongïalam ki nongsynshar mynshwa kum jong I (L) B B Lyndoh, (L) Capt. W A Sangma, etc, ki ju mai ki ju sneng ïa ki nongïalam bad nongkyrshan jong ka party jongki ba kim bit satia da lei lei ruh ban pyndonkam ïa ki ‘tiensih ‘tien sang. Ba kin tim kin tla lei lei, kata, ki la pynjah burom ym tang ïa ki, kum ki nongïalam hynrei ïa ka party jongki baroh kawei ba ki la ïalam. Kumno da ki nongïalam party kin hikai, pynshlur bad ai mynsiem pynban ïa ki nongkyrshan ban pyndonkam da ki ktien bym man haba ïohsngew lang ki paidbah ba bun balang? Nangne shakhmat, ki nongïalam ba hakhmat ka party kidei ban sneng ban kraw noh bad ai jingmut ba ka khubor tla bad tim sih – tim sang dei ban pynsahngeh noh shi syndon (with immediate effect) da ki nongïalam nongpynphriang khubor jong ki, ba ïoh ba, kiwei ki party liang pyrshah (political opponents) jongki, kin shim kabu ban sin ne khot pynban kum ka “Party Tla” ïoh poi pynban sha ka jinghiar dor bad ka jingjah burom bad ka jingjem daw ym tang ïa ki nongïalam hynrei shaduh ki nongkyrshan ba lui lui kiba bapli (innocent voters) hakhmat ka pyrthei baroh.
