Ai khublei bad khot ka Demanding Committee sha ka jingplie ka Civil Sub Division ha Patharkhmah.

Nongpoh, Naiwieng 21: Ka Patharkhmah Civil Sub Division Demanding Committee lyngba u Chairman, u Bah Isman Lyngdoh bad u Secretary, u Bah Balawan Syiemiong ki la ai khublei kyrpang ïa ka sorkar MDA ha ka jingïalam u Conrad K. Sangma kum u Myntri Rangbah bad kynthup ruh ïa u MLA ka Jirang Constituency, u Bah Sosthenes Sohtun ba ka jingdawa ban kyntiew kyrdan ïa ka Patharkhmah Administrative Unit sha ka Civil Sub Division ka la urlong, kaba dei kawei na ka jingdawa kaba la slem bah bad kaba la urlong ha kane ka sorkar bad ruh ha ka jingshimti u Bah Sosthenes Sohtun kum u MLA ka Jirang Constituency.
Shuwa ban plie paidbah noh ïa kane ka Civil Sub Division, kitei ki nongïalam ka Demanding Committee ki la ai khublie kyrpang ïa ka sorkar MDA, ïa u Myntri rangbah bad ïa u MLA ka Jirang bad baroh kiba don bynta ha kane ka kam bad ki la pynpaw ruh ba kim lah khlem da ai ka jingsngewnguh kaba khraw, ba kane ka jingap khmih lynti ki paidbah ka thaiñ Ri Bhoi Sepngi ka la urlong bad ka la long shisha kumba ki angnud la bun phew snem mynta.
Na ka liang kitei ki nongïalam ki la khot la wer ruh ïa baroh ki paidbah ka thain Ri Bhoi Sepngi bad kynthup ruh naduh ki syiem, ki longsan ki mansan bad, ki rangbah shnongm ki riew rangah khlem da jer kyrteng ba kin wan ban sakhi lang ha ka 24 tarik u Naiweing ban sa plie ïa kane ka Civil Sub Division ha Patharkhmah.