Nongpoh, Naiwieng 21: Ban pynpoi ïa ki kam pynroi kumba la mang da ka sorkar lyngba ki kam pynroi kaba dei ka bhah jong ki nongmihkhmat ban sam sha ki paidbah, u MLA ka Nongpoh Constituency ha ka sngi Saitjaiñ u la sam ïa ki kam song pynroi sha ka Shnong Marmain bad ruh ïa ka Raid Marmain ba hap ha Nongpoh Constituency.
Ïa kitei ki song jong ki kam pynroi lyngba ka skhim SRWP, u MLA ka Nongpoh, u Bah Mayral Born Syiem u la sam sha ki paidbah ha ka jingïalang kaba la long ha la ïing Dorbar ka Shnong Marmain bad la don ryngkat ruh da ki paidbah nongshong shnong.
Nalor ki paidbah nongshong shnong, ki riew rangbah kiba la don lang ki kynthup ruh naduh u Bongthai ka Raid Marmain, u Bah B. Rynchon, u Rangbah Shnong ka Marmain, u Bah Biren Klei, ki basan ka Raid bad kynthup ruh ki riew rangbah bad ki riew pawkhmat na ka thaiñ Marmain.
Kitei ki song kam pynroi ba la sam da u MLA ka Nongpoh ki kynthup ïa ka Auditorium Hall jong ka shnong Marmain ba la mang ha ka jinglut kaba T. 3 lak, ka Auditorium Hall ka Raid Marmain ha ka jinglut kaba T. 3 lak , ka song pynroi na ka bynta ban pynbha ïa ka skul ka Balang Baptist Church ha ka jinglut kaba T. 1 lak bad kynthup ruh ka sound system sha ki khun samla ka Balang Katholik bad ruh la mang T. 40 hajar na ka bynta ban thied ïa ki tiar pud tiar tem tynrai ka Raid Marmain.
Haba kren ha kane ka sngi, u MLA ka Nongpoh, u Bah Mayral Born Syiem, u la pynpaw ka jingkmen ban ioh ban ïa don ryngkat bad ki nongïalam Raid, ki nongïalam Shnong bad ki paidbah bad ka thong hi ka long ban saindur ïa ka bha ka miat bad ka roi ka par ki paidbah ba kum u MLA u don ka jingkitkhlieh ban kyntiew ïa ka dong bad ka thaiñ hapoh ka Constituency.
Shuh shuh, u la ong ruh kum u MLA u la pyrshang ban trei borbah ban pynpoi ïa ki kam pynroi ha man la ki shnong hapoh ka Nongpoh Constituency bad kam dei pat ka kam kaba suk ban pynbiang lut ïa baroh ki jingdonkam ki shnong bad ki paidbah bad kaei kaba donkam ka long ban don ka jingïatrei lang bad ka jingïasngewthuh jingmut na ka bynta ban ngin dang lah shuh shuh ban pyntyllun ïa ka jingtreikam ban kyntiew ïa ka bha ka miat, ka ioh ka kot bad ka roi kapar jong u paidbah ha ka Constituency hi baroh kawei, u la bynrap.
