Nongstoiñ, Nailur 02: Ka seng Voice of the Peoples Party Rambrai Jyrngam Constituency, ka la ujor ha ka sngi balang bad dawa jingshai ruh na u Principal District Institute of Education and Training (DIET) Nongstoiñ, halor ka jingrung kyrteng ki ar ngut ki briew sha ka shlem ai jinghikai jong kane ka skul bah, hynrei kim dei satia pat kiba na Rambrai Block.
U Bah Robert B.Wahlang Organising Secrteary jong ka VPP Rambrai Jyrngam, u la ong ba ka party lyngba ka jingthoh ka la pan jingshai na u Principal jong ka DIET halor kitei ki ar tylli ki seat, namar katkum ka jinglap jong ki nongïalam ka seng, kine kim don bynta ei ei hapoh ka Rambrai Block bad kim dei ki candidate kiba hap hapoh Rambrai Block.
“Ngi wanrah ïa kane ka jingujor da ka jingthmu ban pynneh ïa ka jingkhuid, ka jingryntih, ka jingbishar hok bad ka jingpynbeit kaba dei ha ka rukom jied candidate. Kumta, ngi la buh ka jingkyrpad ïa ka tnad ban leh ïa ka jingtohkit kaba donkam bad ban shim ïa ka sienjam kaba dei lada lap ïa kano kano ka jingbakla”, ong u Bah Robert.
“Ngi la kyrpad ruh ba ka tnad kan pyntip sha ngi shaphang ka jingmih na ka jingtohkit bad ka jingpynshai ba la ai da ka bor ba dei peit. Namar ngi lyngngoh kumno u Roll No 575 jong ka Malang Joypur bad Roll No 753 jong ka Madanjira ki don ha Rambrai kumba la paw. Ngin ïai ap haduh ba ka tnad hi kan da tohkit bad ïoh ïa ka jingshai”, u la ong.
Shuh shuh, u la ong ruh ba halor kane ka juh ka phang la dep ban ujor ruh ai jingthoh bad ujor sha u Block Development Officer jong ka Rambrai C&RD Block. Namar, ka jingmih kyrteng kitei ki ar ngut na ka bhah jong ka Rambrai Block ka la pynkyndit, namar katkum ki jingtip ba tikna, kine ki ar ngut kim hap satia ha Rambrai Block hynrei ki dei na Mawshynrut Block.
