Halor ka aiñ, ka koit ka khiah, ka pule puthi bad bun ki hok leit pynshai ka DLSA ha Khrang

Sohra, Nailur 02 : Ka District Legal Services Authority (DLSA), Shillong, ha ka jingïatreilang bad ka Meghalaya State Legal Services Authority (MSLSA), Shillong, hapoh ka jingpeit jong ka National Legal Services Authority (NALSA), ka la pynlong da ka prokram pynsngewthuh paidbah halor ka aiñ ha Nangkyrsoi Secondary School, Khrang, Khatarshnong-Laitkroh C&RD Block.
Ïa kane ka prokram la pynlong kum shi bynta ban pyntreikam ïa ki skhim jong ka NALSA ha ki shnong, bad ka Khrang ka dei kawei na ki shnong ba la shah jied. Ha kane ka prokram la wan shim bynta da ki ophisar bad ki nongmihkhmat na ki tnat Sorkar bapher bapher, ki khynnah pule na Shillong Law College, Shillong, ki khynnah skul bad ki paidbah nongshong shnong.
Haba kren ha kane ka jingïalang, ka Kong B. Kharlukhi, Secretary, MJS, ka la pynpaw ïa ka jingdonkam ban ïoh ïa ka hok khlem da niew ïa ka jingduk ne ka jingnang jingstad. Ka la ong ba kane ka sienjam ka thmu ban pynsngewthuh ïa ki paidbah shaphang ki hok kiba ki don hapoh ka aiñ, ki skhim kiba don bad ka jingïarap kaba lah ban ïoh, bad ban ïarap ïa ki briew ban ïoh ïa ki jingshakri jong ka Sorkar kiba ki dei hok ban ïoh. La ïa kren ruh shaphang ka jingpynrung Aadhaar bad ki lad ai jingsumar bad kumjuh ki jingïalang pynsngewthuh paidbah na kawei ka ïing sha kawei pat kum ki bynta jong kane ka sienjam.
Ki ophisar na ka Khatarshnong Laitkroh C&RD Block ki la ai jingpynshai sha ki paidbah halor ka VB-G RAM-G bad ki kam pynroi bapher bapher ha ki shnong, kynthup ïa ki surok, ki lynti ïaid kjat, ki dam um, ki lad kamai jakpoh bad ki sienjam kiba ïadei bad ka jingkylla ka suiñbneng. La sam ruh ïa ka jingtip halor ka jingïatreilang bad ki skhim kum ka PMAY, ki prokram Agriculture, MSRLS bad SHG.
Na ka liang ka Kong C. Kongwang, Block Resource Person on Inclusive Education, DMC-SSA, East Khasi Hills District, ka la pynshai halor ki jingïarap ha ka pule puthi kiba don hapoh ka Samagra Shiksha Abhiyan, kynthup ïa ki kot skul khlem da siew, ki jingïarap bai uniform bad ki jingïarap ïa ki khynnah kiba don jingthut ha ki dkhot met, kum ka bai leit bai wan, ki jingkyrshan pisa bad kumjuh ki tiar jingïarap bad kiwei kiwei.
Na ka liang jong ka Tnat Pulit, ka WPSI Kong V. Diengdoh ka la pynsngewthuh ïa ki paidbah halor ka POCSO Act, ka jingshongkha khynnah bad ki kam runar lyngba ka cyber, da kaba ai jingmut kyrpang halor ka jingshngain bad ka jingpyntikna ïa ka jingïada jong ki khynnah.
Ki heh na ka Tnat ka Koit ka Khiah ka la ai jingtip halor ki skhim bapher bapher jong ka koit ka khiah, kynthup ïa ka Chief Minister’s Safe Motherhood Scheme, Meghalaya Health Insurance Scheme (MHIS) bad PM-JAY. La pynpaw ïa ka jingdonkam jong ka MHIS Card ban ïoh ïa ki jingmyntoi jong ki jingshakri ka koit ka khiah.
U Dr. Kharkongor, Medical Officer, RBSK, Swer Laitkroh Block, u la ai jingtip ruh halor ka RBSK, kynthup ïa ka jingpeit bniah ïa ka koit ka khiah jong ki khynnah skul, ka jingithuh ïa ki jingduna bad ki jingthut ha ka por ba dang khynnah, bad ki jingsumar ei bad ban phah ai jingmut ba kin phah sumar. La pynpaw ruh ïa ka jingdonkam jong ki ANC check-up bad ki 1,000 sngi kiba nyngkong ha ka koit ka khiah jong ka kmie bad khun.
Ka Tnat Social Welfare ka la pynsngewthuh ïa ki paidbah halor ki skhim bapher bapher na ka bynta ki briew kiba don jingthut ha ki dkhot met, kynthup ïa ka UDID (Unique Disability ID), Chief Minister’s Care Scheme for Persons with Disabilities, ki scholarship bad ki jingïarap pule puthi na ka bynta ki khynnah skul kiba don jingthut ha ki dkhot met, ki jingkyrshan ïoh kam na ka bynta ki samla kiba pass Class X bad kiba don jingthut ha ki dkhot met, ki tiar jingïarap bad kumjuh ki jingkyrshan ïa ki samla pule kynthup ïa ka scholarship ïa ki samla kiba pass bha.
Ka tnat ka la ban jur ruh halor ka jingdonkam ban pynrung lang ïa baroh, ban ai ïa ki lad ban ïoh bynta mar kumjuh bad ban ym leh shiliang ïa ki briew kiba don jingthut ha ki dkhot met.
Kane ka prokram ka la ai ïa ka lad kaba kongsan ïa ki paidbah jong ka Khrang ban tip shaphang ki hok jong ki hapoh ka aiñ, ki skhim Sorkar bad ki jingshakri kiba kongsan, bad ha kajuh ka por ka la pynkhlain ïa ka jingïatreilang hapdeng ki tnat Sorkar bad ka imlang sahlang ha ka kyrdan shnong.
La pyntip ruh sha ki paidbah ba lah ban phone ïa ka NALSA toll-free legal aid helpline – 15100 na ka bynta ka jingïarap ha ki kam aiñ, ka jingbthah ne ka jingtip halor ki jingeh kiba ïadei bad ka aiñ bad ka jingïoh ïa ki jingshakri kiba ïadei bad ka aiñ.