Ha ka PAC, kyntu ka HYC ban bishar mardor ïa ka jingkynshew pisa ba T.4, 444.43 klur

By Mawphor Editor On Sep 3, 2026

Shillong, Nailur 2: Ka Hynniewtrep Youth Council (HYC) kala kyntu ïa ka Public Account Committee (PAC) jong ka Meghalaya Legislative Assembly ba kan shong bishar mardor ïa ka jingkynshew pisa ka Sorkar haduh T.4, 444.43 klur ha ki 22 tylli ki Public Sector Undertaking (PSU) kiba lah pat ban pynmih kamai tang T.0.20 klur katkum ka CAG report ha u snem 2024-25.
Haba kdew ïa ka kaiphod ka CAG halor ka Pla tyngka ka Jylla jong u snem 2024-25, ka HYC ha ka mudui sha u Chairperson ka PAC ha ka sngi Balang, kala ong ba ka jingkynshew pisa kaba bun bah kat haduh ka 31 tarik Lber, 2025, kala lah ban wanrah ïa ka jingmih kaba rit palat, kaba pynmih ruh ïa ka jingkylli kaba sngewkhia jur halor ka jingpyndonkam ïa ka pisa.
U President ka HYC Roy Kupar Synrem ula ong ba kane ka kam kala ïaid palat ïa ka jingmih kaba rit, naba ka Sorkar kala theh biang ïa ka pisa sa T.467 klur ha u snem 2024-25 wat hapdeng ka jingbym lah pyntreikam ïa ka jingkynshew bala don lypa.Ka Council ka kwah ïa ka PAC ba kan khmih ïa ki jingpynksan, ka tyllong jong ka pisa bad ka jingkhmih bniah ha lyndet ka jingtheh pisa thymmai.
Ka HYC kala kdew ruh ba watla ka dor sut halor ka jingshim ram ka Sorkar ka long 5.31%, ka jinglah pynmih pisa na ki jingkynshew ha ki PSU kan jan long nod, kaba la nang tynrong ïa ka jingkit ba khia ha ka pla tyngka ka Jylla.
“T.4, 444.43 klur ka dei ka pisa u paidbah.Haba kat kane ka jingkynshew ka lah ban pynmih pisa tang T.20 lak, ki paidbah ka Jylla ki don hok ban ioh ïa ka jubab.Ka Sorkar kam lah ban pynbteng ban kynshew ïa ka pisa u paidbah khlem da pyni ïa ka jingpyndonkam ïa ka pisa, ka jingkitkhlieh bad ka jingmih kaba lah ban shim jingkhein” ula ong.
Ka Council kala ong ba ka PAC ka dei ban bishar bniah ia ka jingtreikam bad ka jinglah ban treikam bha jong baroh ki 22 tylli ki PSU, bishar ia ki jingduna ha ka jingpyndonkam ia ka pisa, tynrong ia ka jingkitkhlieh haba I donkam bad buh da ka por ia ka Sorkar ban ai ia ka Action Taken Report.